საპარლამენტო უმრავლესობის ლიდერის, მამუკა მდინარაძის განცხადებით, ნეგატიური ამბები [კრიმინოგენული ვითარების შესახებ] "ქართული ოცნების" რეიტინგზე გავლენას ვერ მოახდენს. ამის შესახებ მან "ტელეკომპანია იმედის" ეთერში ისაუბრა.
მისივე თქმით, ბინძური კამპანიის მიუხედავად, "ქართული ოცნების" რეიტინგი 55%-დან 60%-მდეა.
"ამან არ შეიძლება გავლენა იქონიოს რეიტინგზე იმიტომ, რომ ხალხი ყველაფერს ხედავს და ეს არის მცდელობა, ხალხს დააჯერონ, რომ ქვეყანაში კრიმინალი გაიზარდა. რეალური ცხოვრება რა თქმა უნდა, არ არის იდეალური. თვითკმაყოფილებას არ ვართ მიცემულები და კარგად ვხედავთ გამოწვევებს, ხალხის გაჭირვებას, რომელიც (2012 წლიდან) 30%-დან შემცირდა 19-ნახევარ პროცენტამდე, თუმცა ესეც ძალიან ბევრია და უამრავი მსგავსი საკითხია, სადაც ხელშესახები პროგრესი, შედეგი და გეგმა გვაქვს, რამაც საბოლოო ჯამში უნდა მიგვიყვანოს ევროკავშირის წევრობამდე, რომლის განაცხადსაც აუცილებლად შევიტანთ 2024 წელს", - აღნიშნა მამუკა მდინარაძემ.
