რუსიო ოპოზიციონერისა და კრემლის მწვავე კრიტიკოსის, ალექსეი ნავალნის ჯანმრთელობის მდგომარეობა სტაბილურია და შეინიშნება მცირედი გაუმჯობესება. ნათქვამია ბერლინის „შარიტეს“ კლინიკის მიერ გავრცელებულ განცხადებაში.
ამავდროულად, ნავალნი რჩება ინტენსიური თერაპიის განყოფილებაში ხელოვნური სუნთქვის აპარატზე და იმყოფება ხელოვნურად გამოწვეულ კომაში.
"მისი მდგომარეობა ჯერ კიდევ მძიმეა, თუმცა მის სიცოცხლეს საფრთხე არ ემუქრება", - იუწყება კლინიკა.
გასულ კვირას"შარიტეს" კლინიკამ გაავრცელა განცხადება, სადაც ნათქვამია, რომ ალექსეი ნავალნი მოწამლულია. გერმანელი ექიმები იუწყებოდნენ, რომ ჯერჯერობით უცნობია თუ რა კვალს დატოვებს მომწამვლელი ნივთიერება ნავალნის ჯანმრთელობასა და ნერვულ სისტემაზე.
რუსი ოპოზიციონერი შეუძლოდ 20 აგვისტოს, თვითმფრინავში გახდა, როდესაც ტომსკიდან მოსკოვში მიემგზავრებოდა. მომხდარის გამო თვითმფრინავი ავარიულად ომსკში დაეშვა. აეროპორტიდან ნავალნი ომსკის საავადმყოფოში გადაიყვანეს.
მოგვიანებით, დიდი ძალისხმევის შემდეგ, ალექსეი ნავალნი სამკურნალოდ გადაიყვანეს ბერლინის "შარიტეს" კლინიკაში. ომსკელი ექიმები ნავალნის ტრანსპორტირების წინააღმდეგნი იყვნენ.
ნავალნის ახლობლები და გარემოცვა დარწმუნებულია, რომ ოპოზიციონერი პოლიტიკოსი მოწამლეს და ამაში კრემლის ხელი ურევია. მათივე მტკიცებით, უშუალოდ კრემლი იყო ჩართული იმაში, რომ ნავალნის ციმბირიდან ბერლინის კლინიკაში ტრანსპორტირება გაეჭიანურებინათ.