შეერთებული შტატების სახელმწიფო დეპარტამენტი შეშფოთებულია გერმანელი ექიმების წინასწარი დასკვნით, რომ რუსი ოპოზიციონერი ალექსეი ნავალნი მოწამლეს. ამის შესახებ სახელმწიფო მდივნის მაიკ პომპეოს განცხადებაშია ნათქვამი.
"შეშფოთებულები ვართ ცნობით, რომ რუსი ოპოზიციონერი აქტივისტი ალექსი ნავალნი მოწამლეს. თუ ეს დასკვნა დადასტურდება, ჩვენ მხარს დავუჭერთ ევროკავშირის მოწოდებას ყოვლისმომცველი გამოძიების ჩატარებისკენ. ბატონი ნავალნის ოჯახი და რუსი ხალხი იმსახურებს სრულ და გამჭვირვალე გამოძიებას და დამნაშავეების პასუხისგებაში მიცემას. სახელმწიფო დეპარტამენტი ალექსეი ნავალნის გვერდში დგას და მის სრულ გამოჯანმრთელებას იმედოვნებს", - ნათქვამია განცხადებაში.
ნავალნის ახლობლები და გარემოცვა დარწმუნებულია, რომ ოპოზიციონერი პოლიტიკოსი მოწამლეს და ამაში კრემლის ხელი ურევია. მათივე მტკიცებით, უშუალოდ კრემლი იყო ჩართული იმაში, რომ ნავალნის ციმბირიდან ბერლინის კლინიკაში ტრანსპორტირება გაეჭიანურებინათ.
გუშინ, "შარიტეს" კლინიკამ გაავრცელა განცხადება, სადაც ნათქვამია, რომ ალექსეი ნავალნი მოწამლულია. გერმანელი ექიმები იუწყებიან, რომ ამ დროისთვის უცნობია თუ რა კვალს დატოვებს მომწამვლელი ნივთიერება ნავალნის ჯანმრთელობასა და ნერვულ სისტემაზე.
რუსი ოპოზიციონერი შეუძლოდ გასული კვირის ხუთშაბათს, თვითმფრინავში გახდა, როდესაც ტომსკიდან მოსკოვში მიემგზავრებოდა. მომხდარის გამო თვითმფრინავი ავარიულად ომსკში დაეშვა. აეროპორტიდან ნავალნი ომსკის საავადმყოფოში გადაიყვანეს.
მოგვიანებით, დიდი ძალისხმევის შემდეგ, ალექსეი ნავალნი სამკურნალოდ გადაიყვანეს ბერლინის "შარიტეს" კლინიკაში. ომსკელი ექიმები ნავალნის ტრანსპორტირების წინააღმდეგნი იყვნენ.