ევროკავშირი გმობს რუსი ოპოზიციონერის ალექსეი ნავალნის სიცოცხლის ხელყოფის მცდელობას, რომელიც ამჟამად ბერლინის "შარიტეს" კლინიკის ინტენსიური თერაპიის განყოფილებაში გადის მკურნალობას.
ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში ჟოზეპ ბორელმა მოუწოდა რუსეთის ხელისუფლებას, დაიწყოს ნავალნის მოწამვლის შემთხვევის დამოუკიდებელი და გამჭვირვალე გამოძიება.
"რუსეთის ხალხი, ისევე როგორც საერთაშორისო საზოგადოება მოითხოვნებ ნავალნიზე თავდასხმის ირგვლივ ფაქტების დადგენას. დამნაშავეები აუცილებლად უნდა დაისაჯონ", - ნათქვამია განცხადებაში.
ევროკავშირი მადლობას უხდის ბერლინის "შარიტეს" კლინიკის თანამშრომლებს და ნავალნის სწრაფ გამოჯანმრთელებას უსურვებს.
გუშინ, "შარიტეს" კლინიკამ გაავრცელა განცხადება, სადაც ნათქვამია, რომ ალექსეი ნავალნი მოწამლულია. გერმანელი ექიმები იუწყებიან, რომ ამ დროისთვის უცნობია თუ რა კვალს დატოვებს მომწამვლელი ნივთიერება ნავალნის ჯანმრთელობასა და ნერვულ სისტემაზე.
რუსი ოპოზიციონერი შეუძლოგ გასული კვირის ხუთშაბათს, თვითმფრინავში გახდა, როდესაც ტომსკიდან მოსკოვში მიემგზავრებოდა. მომხდარის გამო თვითმფრინავი ავარიულად ომსკში დაეშვა. აეროპორტიდან ნავალნი ომსკის საავადმყოფოში გადაიყვანეს.
მოგვიანებით, დიდი ძალისხმევის შემდეგ, ალექსეი ნავალნი სამკურნალოდ გადაიყვანეს ბერლინის "შარიტეს" კლინიკაში. ომსკელი ექიმები ნავალნის ტრანსპორტირების წინააღმდეგნი იყვნენ.
