ხანგრძლივი დისკუსიის შემდეგ, ბრიუსელში მუდმივმოქმედ წარმომადგენელთა კომიტეტმა, რომელიც ევროკავშირის წევრი ქვეყნების ელჩებს აერთიანებს, შეძლო შეთანხმება ქვეყნების ჩამონათვალზე, რომელთათვისაც 1-ლი ივლისიდან ევროკავშირის საზღვრების გახსნა რეკომენდებულია.

ინფორმაციას დიპლომატიურ წყაროზე დაყრდნობით, ფრანგული გამოცემა Le Monde ავრცელებს.

გამოცემის ინფორმაციით, ევროკავშირის ელჩების მიერ შეთანხმებულ სიაში 14 ქვეყანა მოხვდა, მათ შორის საქართველო.

საქართველოს გარდა სიაში მოხვდნენ ავსტრალია, ახალი ზელანდია, იაპონია, სამხრეთ კორეა, კანადა, მონტენეგრო, სერბეთი, ტაილანდი, ურუგვაი, რუანდა, ალჟირი, მაროკო და ტუნისი.

როგორც ვარაუდობენ, სია მომავალ კვირას, სავარაუდოდ ორშაბათს, ევროკავშირის წევრი ქვეყნების უმრავლესობით უნდა დამტკიცდეს.

მანამდე New York Times-ი იტყობინებოდა, რომ ევროკავშირის ელჩებმა მოამზადეს სია, რომელშიც 18 ქვეყანა, მათ შორის საქართველოც იყო.

სიის ფორმირებაზე ევროკავშირის ელჩები მუშაობენ. საბოლოო დასტური ევროკავშირის წევრმა სახელმწიფოებმა უნდა გასცენ, თუმცა სიას იურიდიული ვალდებულება არ იქნება და ის სარეკომენდაციო ხასიათისაა.

იუწყებიან, რომ სია პერიოდულად განახლდება ეპიდემიოლოგიური ვითარების გათვალისწინებით.

კიდევ უფრო ადრე Euronews-მა გაავრცელა ინფორმაცია, რომ ევროკომისიამ მოამზადა პირველად სია, სადაც 47 ქვეყანა, მათ შორის საქართველოც შედიოდა.

შეგახსენებთ, რამდენიმე დღის წინ, საქართველომ რეგულარულ ფრენებზე დაშვება უკვე მეოთხედ, 1-ელ აგვისტომდე გადაავადა.

როგორც ცნობილია, ტურიზმის ამოქმედების ანტიკრიზისული გეგმის მიხედვით, უსაფრთხო დერეფნების შესაბამისად, საჰაერო მიმოსვლის და საერთაშორისო ტურიზმის გახსნა მთავრობის მიერ, 1-ელი ივლისიდან დაანონსდა.