საქართველოს საგარეო საქმეთა სამინისტროს და “SPAR საქართველოს“ თანამშრომლობით, ევროპის 20-მდე ქვეყანაში მყოფი განსაკუთრებული საჭიროების მქონე საქართველოს მოქალაქეები SPAR-ის სავაჭრო ქსელის სასურსათო ვაუჩერებით ისარგებლებენ.
"SPAR საქართველოს" საერთაშორისო პარტნიორების საშუალებით 2000-მდე სასურსათო ვაუჩერი საფრანგეთში, ესპანეთში, ბელგიაში, იტალიაში, ნიდერლანდებში, საბერძნეთში, ბელარუსში, პორტუგალიაში, უნგრეთში, ნორვეგიაში, მალტაში, გერმანიაში, დანიაში, პოლონეთში, ავსტრიაში, უკრაინაში, სლოვენიაში, შვეიცარიაში, გაერთიანებულ სამეფოსა და ევროპის სხვა ქვეყნებში მყოფი განსაკუთრებული საჭიროების მქონე საქართველოს მოქალაქეებს გადაეცემათ. ისინი აღნიშნული სასურსათო ვაუჩერებით ჩამოთვლილ ქვეყნებში მდებარე სპარ ინტერნეიშენალის მაღაზიათა ქსელში ისარგებლებენ.
აღსანიშნავია, რომ მსოფლიოში არსებული საგანგებო მდგომარეობის მიუხედავად, “SPAR INTERNATIONAL"-ის დახმარებით მოკლე დროში მოხერხდა საქართველოს მოქალაქეებისთვის განკუთვნილი აღნიშნული ერთჯერადი აქციის ორგანიზება. „SPAR INTERNATIONAL“-ის ბრენდი საქართველოს გარდა მსოფლიოს 49 ქვეყანაში, 13 ათასზე მეტი მაღაზიით არის წარმოდგენილი.
საქართველოს პრემიერ-მინისტრის ხელმძღვანელობით არსებული საკოორდინაციო საბჭოს მითითებით საზღვარგარეთ საქართველოს დიპლომატიური მისიები მსოფლიო მასშტაბით COVID-19-ის გავრცელების ფონზე, ადგილზე მყოფი საქართველოს მოქალაქეების დასახმარებლად მუშაობის საგანგებო, 24 საათიან რეჟიმზე არიან გადასულები. ამ დრომდე საცხოვრებლით, საკვებით და პირველადი საჭიროების ნივთებით ათასობით მოქალაქეს გაეწია დახმარება.
