საინვესტიციო და დეველოპერული კომპანია "დექსუსი" "ცენტრ-პოინტის" მომხმარებლებისთვის მიმართვას ავრცელებს, სადაც ნათქვამია, რომ თითოეულ ობიექტზე სამშენებლო პროცესის განახლების შესაბამისად მოხდება ყველა არსებული მომხმარებლის ინფორმირება.
"ახალი ხელშეკრულებების გაფორმების მიზნით შედგება ინდივიდუალური შეხვედრა "დექსუსის" შესაბამის სამსახურებთან. აღნიშნულის შესახებ ყველა მომხმარებელი ინფორმირებული იქნება პერსონალურად", - ნათქვამია მიმართვაში.
იმავდროულად, "დექსუსი" კონკრეტულ ობიექტზე კლიენტთან ნებისმიერი სახის ურთიერთთანამშრომლობის პროცესს მხოლოდ მშენებლობის განახლებასთან ერთად დაიწყებს.
"მომხმარებლებსა და კრედიტორებს ვთხოვთ, გაგებით მოეკიდონ არსებულ რეალობას და ხელი შეუწყონ აღნიშნულ პროცესს", - ნათქვამია კომპანიის მიმართვაში.
შეგახსენებთ, რომ კომპანია "დექსუსმა" "ცენტრ პოინტი" და მასთან დაკავშირებული დაუსრულებელი პროექტები მართვაში აიღო. კომპანიებს შორის ხელშეკრულება 10 სექტემბერს გაფორმდა. "დექსუსი" ვალდებულებას იღებს 3 წლის განმავლობაში დაასრულოს "ცენტრ-პოინტის" ყველა დაუსრულებელი პროექტი. სამოქმედო გეგმის შესაბამისად ყველა ობიექტზე სამუშაოები ეტაპობრივად განახლდება.