სოფლის მეურნეობის სექტორისა და ინტელექტუალური საკუთრების დაცვაზე ამიერიდან ბიზნეს ასოციაციის შესაბამისი კომიტეტებიც იზრუნებენ.
საქართველოს ბიზნეს ასოციაციამ შექმნა ორი ახალი კომიტეტი - სოფლის მეურნეობის განვითარების და ინტელექტუალური საკუთრების დაცვის კომიტეტები, რომლის პრეზენტაციაც დღეს სასტუმრო "შერატონ მეტეხი პალასში" გაიმართა.
სოფლის მეურნეობის განვითარების კომიტეტს "თბილღვინოს" გენერალური დირექტორი, გიორგი მარგველაშვილი უხელმძღვანელებს.
მისი განმარტებით, კომიტეტი სამი ძირითადი მიმართულებით იმუშავებს. იგი მაქსიმალურად შეეცდება ინვესტორს სოფლის მეურნეობის სექტორში არსებულ ვითარებაზე დეტალური ინფორმაციები მიაწოდოს და მათი პრობლემების გადაჭრაზეც იზრუნოს.
"მნიშვნელოვანია, რომ სოფლის მეურნეობის სფეროს ცალკეული სეგმენტების სტრატეგის დაწერაზე ვიმუშაოთ და მჭიდრო ურთიერთობაში ვიყოთ საერთაშორისო დონორ ორგანიზაციებთან, რათა საჭირო დაფინანსება მივიღოთ. იმავდროულად ვგეგმავთ, რომ სოფლის მეურნეობის სამინისტროსთან ერთად დარგის ერთიანი სტრატეგიის შემუშავებაშიც აქტიური მონაწილეობა მივიღოთ.
იმავდროულად ვაპირებთ დარგის ანალიტიკური კვლევები ჩავატაროთ, რათა ვიცოდეთ რა რაოდენობის პროდუქცია იწარმოება ადგილობრივ ბაზარზე და რა მოცულობის იმპორტია საჭირო. კვლევების შედეგად კი დაიდება ნათელი სურათი თუ რა პოტენციალი აქვს რეალურად სოფლის მეურნეობას და როგორ გამოვიყენოთ შემდგომში ეს პოტენციალი.
მნიშვნელოვანი ფაქტორია ასევე სოფლის მეურნეობის პროდუქციის პრომოუშენი, რაც პროდუქციის რეალიზაციის, ახალი ბაზრების მოძიებისთვის მნიშვნელოვანი წინაპირობაა,"- განაცხადა გიორგი მარველაშვილმა.
სოფლის მეურნეობის მინისტრის ბაკურ კვეზერელის განმარტებით, სამინისტრო ბიზნესთან მჭიდრო თანამშრომლობას გეგმავს.
"მსოფლიოში სოფლის მეურნეობის სექტორი საკმაოდ დინამიურად ვითარდება და ეს კარგად გამოჩნდა გლობალური ეკონომიკური კრიზისის პერიოდშიც. ჩვენ მოხარულნი ვართ, რომ ბიზნესი სახელმწიფოსთან თანამშრომლობის გაქტიურებას გეგმავს. მხოლოდ საერთაშორისო ინვესტორებზე მუშაობა, ჩვენი ძირითადი პრიორიტეტი არ არის. ჩვენთვის მნიშვნელოვანია, ასევე, მჭიდრო თანამშრომლობა გვქონდეს ადგილობრივ ბიზნესთან,"- განაცხადა ბაკურ კვეზერელმა.
როგორც ბიზნეს ასოციაციაში განმარტავენ, სოფლის მეურნეობის განვითარების კომიტეტი იმუშავებს საქართველოში აგრარული სექტორის განვითარების ხელშეწყობის, ამ სფეროში რეფორმების მხარდაჭერისა და სტიმულირების, მარეგულირებელი საკანონმდებლო ბაზის სრულყოფის და საერთაშორისო ორგანიზაციებთან თანამშრომლობით კონკრეტული პროექტების განხორციელების მიმართულებებით.
ბიზნეს ასოციავიის ინტელექტუალური საკუთრების დაცვის კომიტეტს ირაკლი კაკაბაძე (შ.პ.ს. „ალტა"-ს გენერალური დირექტორი) უხელმძღვანელბს.
როგორც კაკაბაძემ განაცხადა, კომიტეტი შექმნილია ბიზნეს ასოციაციასა და "საქპატენტს" შორის გაფორმებული მემორანდუმის შესაბამისად,
კომიტეტის ძირითადი სამუშაო მიმართულება იქნება ინტელექტუალური საკუთრების რეგისტრაციასთან და დაცვასთან დაკავშირებული ურთიერთობები.
"საქპატენტთან" მჭიდრო თანამშრომლობის ფარგლებში ასოციაციის წევრებს ექნებათ წვდომა "საქპატენტში" დაცულ ინფორმაციასთან, მიიღებენ კონსულტაციებს სასაქონლო და საპატენტო ნიშნების განაცხადის შედგენასთან დაკავშირებით, შესაძლებლობა ექნებათ დაესწროთ თემატურ ტრენინგებს და ა.შ.
კაკაბაძის განმარტებით, ინტელექტუალური საკუთრების დაცვის კომიტეტი აქტიურად იმუშავებთ ქართული კომპანიების ინტელექტუალური საკუთრების დაცვაზე.
"საქპატენტის" ხელმძღვანელის ირაკლი ღვალაძის განცხადებით, ქართული ბიზნესი ბოლო პერიოდში ინტელექტუალური საკითხების დაცვით ინტენსიურად დაინტერესდა.
"მოხარულნი ვართ, როცა "საქპატენტთან" ბიზნესი აქტიურ თანამშრომლობას იწყებს. ქართული კომპანიები ამ მიმართულებით აქტიურდებიან და ბოლო პერიოდში ქართული ბრენდების რეგისტრაციაც იზრდება, სამომავლოდ მრავალი ახალი პროექტის დაწყებას ვგეგმავთ, მათ შორის პატენტების კომერციალიზაციას",- განაცხადა "საქპატენტის" ხემძღვანელმა ირაკლი ღვალაძემ.
