თბილისში მიმდინარე საერთაშორისო კონფერენციაზე „პატრიოტთა ალიანსის“ გამოჩენას ხმაური მოჰყვა. ირმა ინაშვილი სიტყვით გამოსვლას მოითხოვდა. პოლიტიკოსს ნატოსთან დაკავშირებით პოზიციის დაფიქსირება სურდა, თუმცა მას დარბაზის დატოვება მოსთხოვეს.
ინაშვილის განმარტებით, ის არ იყო მიწვეული კონფერენციაზე, თუმცა უფლება აქვს, დააფიქსიროს საკუთარი აზრი.
„მოვედი კონფერენციაზე, რადგან „პატრიოტთა ალიანსზე“ საუბრობენ. მინდა, უბრალოდ გავაკეთო განმარტებები, ვისაუბრო ჩემი პარტიის ხედვაზე. მე ვარ საქართველოს პარლამენტის თავმჯდომარის მოადგილე. მაქვს უფლება, მივიღო მონაწილეობა ამ კონფერენციაში, ვინაიდან სამი დღის განმავლობაში გიგა ბოკერია საუბრობს ჩვენზე ცილისწამებას, ტყუილს ავრცელებს ჩვენთან მიმართებაში და მაქვს საშუალება, პასუხი გავცე. ჩვენი დამახინჯებული ციტატები წარმოადგინეს, აბსოლუტურად კონტექსტიდან ამოვარდნილი. მინდა, ბოკერიას ვუწოდო მატყუარა და გავაკეთო განმარტებები. ჩვენ არც კანონი დაგვირღვევია და დემოკრატია იმას ნიშნავს, რომ მომეცეს ჩემი აზრის დაფიქსირების საშუალება. მე უარი მითხრეს. მოვედი, ვთხოვე ორგანიზატორებს, რომ მონაწილეობა მიმეღო კონფერენციაში. მითხრეს, რომ დამეტოვებინა დარბაზი. რატომ უნდა დავტოვო? მინდა, მოვისმინო, მნიშვნელოვანი თემაა განსახილველი და შემდეგ ვითხოვო უბრალოდ რამდენიმეწუთიანი გამოსვლა“, – განაცხადა ირმა ინაშვილმა.
