კახეთში, ღვინის ქარხნებმა 15 000 ტონა ყურძენი უკვე ჩაიბარეს. აქედან 12 000 ტონა საფერავია, 3 000 ტონა რქაწითელი. როგორც კახეთის საინფორმაციო ცენტრს რთველის საკოორდინაციო შტაბის უფროსმა ტარიელ გაბუნიამ განუცხადა, ამ დროისთვის რეგიონში ყურძენს 17 ღვინის ქარხანა იღებს.
„ყურძნის ძირითადი ნაწილი მევენახეებმა თვითონ გაყიდეს აგრარულ ბაზრებში და სხვა ადგილებში. პირვანდელთან შედარებით ყურძნის ფასმა მოიმატა და ხარისხიანი რქაწითელის ჯიშის ყურძენს ქარხნები 75 - 80 თეთრად იბარებენ, შედარებით ნაკლებ ხარისხიანს 60 - 65 თეთრად. ამაში შედის სახელმწიფოს მიერ გამოყოფილი სუბსიდიის თანხაც", - აღნიშნა ტარიელ გაბუნიამ.
შეგახსენებთ რომ კახეთში რთველი აგვისტოს ბოლოს დაიწყო და სექტემბრის ბოლომდე დამთავრდება. საქართველოს მთავრობის განკარგულებით, რთველის სუბსიდირებისათვის მთავრობის სარეზერვო ფონდიდან 6,1 მილიონი ლარია გამოყოფილი.