საერთაშორისო სავალუტო ფონდისგან (სსფ) მიღებული სახსრები საგარეო დაფინანსების დეფიციტს დროებით ფარავს, _ ნათქვამია სს "ბი ჯი კაპიტალის" მიერ გამოქვეყნებული საქართველოს მაკრო-ეკონომიკური მდგომარეობის შესახებ მორიგ კვლევაში.
სს "ბი ჯი კაპიტალის" ინფორმაციით, საქართველოს მიმდინარე ანგარიშის დეფიციტს, როგორც წესი უცხოური პირდაპირი ინვესტიციები და სესხები ფარავს. აღნიშნული დეფიციტი 2009 წელს განახევრდა და მშპ-ს 11.7% შეადგინა, რაც ძირითადად განპირობებული იყო საშინაო მოთხოვნის შემცირებითა და ლარის გაუფასურებით. ჩვენი პროგნოზით, მიმდინარე წელს გაზრდილი ექსპორტი კიდევ უფრო შეამცირებს აღნიშნულ მაჩვენებელს 10.8%-მდე.
სავარაუდოდ, ქვეყნის კაპიტალისა და ფინანსური ანგარიშების მოსალოდნელი დადებითი ბალანსი 230 მილიონი აშშ დოლარით ნაკლები იქნება (2009 წელს აღნიშნული ბალანსი 25 მილიონ აშშ დოლარით მეტი იყო) მიმდინარე ანგარიშის დეფიციტზე, რადგანაც უცხოური პირდაპირი ინვესტიციების მოცულობა ჯერ კიდევ მცირეა, ხოლო ადგილობრივი ბანკები განაგრძობენ თავიანთი საგარეო სესხების გადახდას. მომავალ წელს საერთაშორისო ფინანსურ ბაზრებზე ვითარების სავარაუდო გააუმჯობესება ხელს შეუწყობს საქართველოს საგარეო დაფინანსების ზრდასა და მიმდინარე ანგარიშის დეფიციტის აღმოფხვრას, მაშინ როდესაც, მიმდინარე წელს აღნიშნულ დეფიციტს საერთაშორისო სავალუტო ფონდისგან მიღებული სახსრები დაფარავს