საქართველოს ახალგაზრდა ძიუდოისტთა ნაკრებისთვის ბულგარეთის ქალაქ სამოკოვში მიმდინარე ევროპის ჩემპიონატის მეორე დღეც წარმატებული გამოდგა. ოთარ კაიდარაშვილის (55კგ) შემდეგ ევროპის ჩემპიონობა ავთანდილ ჭრიკიშვილმა მოიპოვა, მან 81-კილოგრამ წონით კატეგორიაში მთელი პირველობა დამაჯერებლად იასპარეზა და ფინალში გასამარჯვებლად მხოლოდ 57 წამი დასჭირდა.
ჭრიკაშვილმა ფინალში სერბ ალექსანდრ კუკოლჟს იპონით მოუგო. ფინალამდე კი ჭრიკიშვილმა ოთხი მეტოქე დაამარცხა, ჯერ ეფემგილ ბატუჰანს აჯობა ვაზარით, შემდეგ ავსტრიელ კრისტიან ზაჩარს დაძაბულ ორთაბრძოლაში იუკოთი მოუგო, მეოთხედფინალში კი ასევ ვაზარით უკრაინელი დენის გრიგორენკო დაამარცხა.
ფინალში გადასასვლელ შეხვედრაში ქართველი ძიუდოისტი რუს ალბერტ კოსტოევს დაუპირისპირდა და ვაზარით დაამარცხა.
ცნობისათვის, ევროპის ჩემპიონატზე მედლები უკვე 4 წონით კატეგორიაში გათამაშდა, სოსო ლიპარტელიანის გუნდი კი 2 ოქროს მედლით კაცთა შორის საერთო ჩათვლაში უპირობოდ ლიდერობს.
დღეს, 19 სექტემბერს მედლები კიდევ სამ წონით კატეგორიაში 90, 100 და მძიმე წონაში გათამაშდება. საქართველოს ნაკრების სახელით შესაბამისად წონების მიხედვით გიორგი ნოზაძე, მიხეილ ნარიმანიძე და ლევან მათიაშვილი იჭიდავებენ.