საქართველოს პრეზიდენტი, სალომე ზურაბიშვილი უზენაესი სასამართლოს თავმჯდომარის მოვალეობის შემსრულებელს, მზია თოდუას შეხვდა. ინფორმაციას პრეზიდენტის პრესსამსახური ავრცელებს.
"შეხვედრა უზენაესს სასამართლოში გაიმართა, რითაც პრეზიდენტმა ხაზი გაუსვა იმ ფაქტს, რომ დემოკრატიულ საზოგადოებაში კანონის წინაშე ყველა თანასწორია მისი თანამდებობისა და სოციალური სტატუსის მიუხედავად.
მზია თოდუამ შეხვედრის დასრულების შემდეგ პრეზიდენტს უზენაესი სასამართლოს ისტორიული შენობა და მართლმსაჯულების მუზეუმი დაათვალიერებინა, რომელიც 2013 წლის 15 მაისს, მოსამართლის დღეს, უზენაესი სასამართლოს შენობაში გაიხსნა.
მუზეუმის მეორე ნაწილში პირვანდელი სახით შენარჩუნებულია ისტორიული „1 დარბაზი“, რომელიც აღჭურვილია 70-იანი წლების ავეჯით. ამ დარბაზში იმართებოდა გახმაურებული პროცესები, მათ შორის ე.წ. „თვითმფრინავის გამტაცებელთა“, ,,მხედრიონელთა“ და სხვათა საქმეები", - აღნიშნულია პრესსამსახურის მიერ გავრცელებულ განცხადებაში.
