ტურიზმისა და კურორტების დეპარტამენტი აცხადებს ფოტოკონკურსს, სადაც ნებისმიერ მსურველს შეუძლია მონაწილეობის მიღება.
კონკურსი ცხადდება 6 თემაზე: ქართული ცხოვრების წესი, ქართული ღვინო, ქართული სახლი, მთიანი საქართველო, საქართველოს ზღვისპირეთი და ზოგადად საქართველო.
თითოეულმა კანდიდატმა უნდა წარმოადგინოს არა უმეტეს 5 ფოტოსურათისა თითო ნომინაციაში. კომისიის მიერ ყოველ ნომინაციაში შეირჩევა 15 საუკეთესო ფოტო, საერთო ჯამში 90 სურათი, რომლებიც ავტორის მითითების გარეშე განთავსდება ტურიზმისა და კურორტების დეპარტამენტის სოციალურ ვებ-გვერდზე - Facebook-ზე. ხმის მიცემის შედეგად გამოვლინდება 21 საუკეთესო ფოტო - 3 სურათი თითო ნომინაციაში. ასევე შეირჩევა 3 ფოტოსურათი ნომინაციისთვის "ინტერნეტრჩეული".
ფოტოების გაგზავნა შესაძლებელია ციფრულ ფორმატში ელექტრონულ ფოსტაზე georgia@tourism.gov.ge, მსურველებს ასევე შეუძლიათ ფოტოები მოიტანონ ტურიზმის საინფორმაციო ცენტრში, თავისუფლების მოედანზე.
15 ოქტომბრიდან, სამი დღის განმავლობაში, მოხდება საუკეთესო 90 ფოტოს შერჩევა, რომლებიც განთავსდება ინტერნეტში. ოქტომბრის ბოლოს კი ტურიზმისა და კურორტების დეპარტამენტი ფოტოების ავტორების მითითებით უზრუნველყოფს გამარჯვებული 21 სურათის გამოფენას "ცისფერ გალერეაში" და შეიძენს ამ ფოტოებს.