ბოლო პერიოდში ბათუმის ბულვარში ტურისტთა ელექტრომობილით დაზიანების ფაქტები გახშირებულია. რამდენიმე დღის წინ ორი უცხოელი ტურისტის დაზიანების შემდეგ, დღეს კიდევ ერთი შემთხვევა დაფიქსირდა. ახალ ბულვარში, არდაგანის ტბის მიმდებარე ტერიტორიაზე 25 წლის ტურისტი ქალბატონი ელექტრომობილით სეირნობისას კიბეზე დაგორდა და დაზიანდა.
სასწრაფო დახმარების ბრიგადამ ქალბატონი ჭრილობის ზედაპირული დამუშავებისათვის რეფერალურ საავადმყოფოში გადაიყვანა. ბოლო ერთი თვის მონაცემებით, ელექტრომობილით 3 ადამიანია დაზიანებული. ოფიციალური სტატისტიკის მიხედვით, ორი წლის განმავლობაში ელექტრომობილით დაზიანების 51 შემთხვევაა დაფიქსირებული.
ბულვარის ტერიტორიაზე, ტრანსპორტის მოძრაობის ახალი წესი 1 მაისიდან ამოქმედდება. ბულვარის ინიციატივას საკრებულომ მხარი დაუჭირა.