პარლამენტის თავმჯდომარე დღეს გუნდურობაზე რომ საუბრობდა, ალბათ უმჯობესი იქნება, მას [სოფო კილაძეს] მიუთითოს პირველ რიგში, თორემ მე ვერ მიმითითებს, - განაცხადა ტელეკომპანია „პირველის“ ეთერში ეკა ბესელიამ, რომელმაც უზენაეს სასამართლოში წარსადგენი მოსამართლეთა 10 კანდიდატურის გამო, პარლამენტის იურიდიული კომიტეტის თავმჯდომარის პოსტი დღეს დატოვა.
„ქალბატონ კილაძეს ნამდვილად ვურჩევდი, რომ არ დააზიანოს ის გუნდი, რომელშიც ის დღეს არის, თავისი ქმედებით და განცხადებით. ის რომ სალომე სამადაშვილის გულშემატკივარი იყო დღეს, მისი არჩევანია და მე მგონი, გასაკვირი ამაში, ყოველ შემთხვევაში, ჩემთვის არაფერი არ იყო. ძალიან ცუდ როლშია დღეს და მე არ ვურჩევ მას გააგრძელოს ეს რიტორიკა. სხვაგვარად ის უფრო მწარე პასუხს მიიღებს. მე მგონია, ამ ლექსიკით არ უნდა საუბრობდეს ადამიანი. პარლამენტის თავმჯდომარე დღეს გუნდურობაზე რომ საუბრობდა, ალბათ უმჯობესი იქნება, მას [სოფო კილაძეს] მიუთითოს პირველ რიგში, თორემ მე ვერ მიმითითებს. იმიტომ რომ, ის ადმიანები, რომლებიც გამარჯვების შემდეგ შემოუერთდნენ „ქართულ ოცნებას“ მე გუნდურობას ნუ მასწავლიან და ვერც მასწავლიან. ამიტომ, დავსვათ აქ წერტილი“, - განაცხადა ბესელიამ და აღნიშნა, რომ მისთვის სასიცოცხლოდ მნიშვნელოვანია, რომ უზენაეს სასამართლოს ჰყავდეს, დამოუკიდებელი, ძლიერი მაღალი კვალიფიკაციის, სანდოობისა და ავტორიტეტის მქონე მოსამართლეები.
„მე დღეს ვთქვი ის, რაც ვთქვი. გავაკეთე ის, რაც გავაკეთე. მიმაჩნია რომ სწორად გავაკეთე. ჩემთვის შედეგია მთავარი და არა - ვინ, ვის დაასწრებს განცხადებებს და ვინ როგორ გამოჩნდება. საერთოდ არ მაინტერესებს, როგორ გამოვჩნდები. თანამდებობა მექნება თუ არა და ვიცე-სპიკერი ვიქნები თუ არა. არ მაინტერესებს არანაირი თანამდებობა. სასიცოცხლოდ მნიშვნელოვანია ჩემი ქვეყნისთვის, ჩვენი მომავლისთვის რომ უზენაეს სასამართლოს ჰყავდეს, დამოუკიდებელი, ძლიერი, მაღალი კვალიფიკაციის, სანდოობისა და ავტორიტეტის მქონე მოსამართლეები. ჩემთვის სასიცოცხლოდ მნიშვნელოვანია, რომ ჩვენმა გუნდმა, ჩვენ მოქალაქეებს რაც უთხრა: ჩვენ ვიქნებით თქვენი სურვილების შემსრულებლები, ამ გზით ვიაროთ და არ გადავუხვიოთ. ჩემთვის ეს არის დღეს მნიშვნელოვანი, როგორც ადამიანისთვის, რომელიც მთელი ცხოვრება, ამ სამართლიანობისთვის იბრძოდა. არც ერთი თანამდებობის გამო არ გადავაბიჯებ ამ მორალურ ბარიერს“, - თქვა ბესელიამ.
შეგახსენებთ, რომ იუსტიციის უმაღლესმა საბჭომ უზენაეს სასამართლოში წარსადგენი მოსამართლეთა 10 კანდიდატურა დაასახელა: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.
პარლამენტში სიის გადაგზავნის შემდეგ ეკა ბესელიამ პარლამენტის იურიდიულ საკითხთა კომიტეტის თავმჯდომარის თანამდებობა დატოვა. მისი თქმით, თანამდებობის დატოვებით უზენაესი სასამართლოს მოსამართლეების უვადოდ დანიშვნის პროცესი შეაჩერა.
ეკა ბესელიას განცხადებას პარლამენტის თავმჯდომარემ, ირაკლი კობახიძემ, გაუგებარი უწოდა. როგორც მან აღნიშნა, რატომ დაუკავშირა ეკა ბესელიამ იურიდიულ საკითხთა კომიტეტის თავმჯდომარეობის თანამდებობიდან გადადგომა უზენაესი სასამართლოს მოსამართლეების საკითხს. მისი თქმით, ეკა ბესელიას გადადგომის მიზეზი დიდ წილად პარტიის შიდა სამზარეულოა.
ირაკლი კობახიძემ ეკა ბესელიას გუნდურობაზე მიუთითა და აღნიშნა, რომ ეკა ბესელია იმ კავშირზე საუბრობდა, რომელიც არ არსებობს და ეს არ არის გუნდური თამაში. მისივე თქმით, გუნდის ნაწილი იქნება ის, ვინც გუნდის თამაშს თამაშობს.