ზვიად ფხაკაძის და ირაკლი ფიფიას ქმედებებში დამატებით იკვეთება სამსახურეობრივი უფლებამოსილების ბოროტად გამოყენების, მტკიცებულებათა განადგურების და გამოძიებისთვის ხელისშეშლის ნიშნები. ხოლო ბატონი ფხაკაძის შემთხვევაში, დამატებით ასევე, მოწმის ცრუ ჩვენებაზე დაყოლიების ნიშნები, - განაცხადა ხორავას ქუჩაზე მომხდარი მკვლელობის საქმეზე შექმნილი პარლამენტის დროებითი საგამოძიებო კომისიის სხდომაზე ოთარ კახიძემ.
ის ქვეყნის მთავარი ძალოვანი უწყების ხელმძღვანელს რეკომენდაციით მიმართავს, დაინტერესდეს პროკურორებისა და გამომძიებლების მხრიდან ჰქონდა თუ არა სამოხელეო დანაშაულს ადგილი. მისივე თქმით, საქმეში საგანგაშო დარღვევებია.
„კომისია რეკომენდაციით მიმართავს საქართველოს მთავარ პროკურორს დაუყოვნებლივ დაიწყოს გამოძიება წინამდებარე დასკვნაში იდენტიფიცირებულ დარღვევებში გამოკვეთილ სსკ-ის მუხლებით გათვალისწინებული დანაშაულთა ნიშნების საფუძველზე.
კომისიას მიზანშეწონილად მიაჩნია, რომ ყველა პირმა უნდა დატოვოს შსს-სა და პროკურატურის რიგები. კომისია დამატებით მიიჩნევს, რომ შსს-ს და პროკურატურის გენინსპექციებმა უნდა შეისწავლონ საქმეში მონაწილე გამომძიებლის ბექა ხუფენიას და საგამოძიებო ჯგუფის სხვა წევრების, ასევე პროკურორების, იმედია გუგუშვილის და მარიკა გოგოხიას საქმიანობა, დაადგინონ, თუ რამდენად იკვეთება მათ საქმიანობაში სამოხელეო დანაშაულის ნიშნები“, - განაცხადა კახიძემ.
