საქართველოს საგარეო სამინისტრო პუნქტობრივად განიხილავს, რუსეთის მიერ შეთანხმების დარღვევას:

1. ძალის გამოყენებაზე უარის თქმა
რუსეთის, როგორც აგრესორისა და კონფლიქტის უშუალო მონაწილის არაკონსტრუქციული დამოკიდებულება ართულებს საქართველოსთან ძალის არ გამოყენების ხელშეკრულების დადებასთან დაკავშირებით პროგრესის მიღწევას ჟენევის მოლაპარაკებათა ფარგლებში.

2. საბრძოლო მოქმედებებისგან თავის შეკავება
მიუხედავად იმისა, რომ დღეს საბრძოლო მოქმედებები არ მიმდინარეობს, მუდმივად ხდება რუსეთის სამხედროებისა და მარიონეტული რეჟიმების არალეგალური ფორმირებების მხრიდან ყოველდღიურ ნიადაგზე ისეთი უკანონო ქმედებები, როგორიცაა ძარცვა, ადამიანების გატაცება, სამართალდამცავ და სამოქალაქო პირებზე შეიარაღებული თავდასხმებისა და ტერორისტული აქტების განხორციელება, უკანონო დაკავება, ისტორიული ძეგლების განადგურება, სახლების დაწვა, იძულებითი პასპორტიზაცია და სხვა. რუსი ოკუპანტები და მარიონეტული რეჟიმები პასუხს აგებენ საქართველოს ადმინისტრაციული სასაზღვრო ზოლის მიმდებარე ტერიტორიებზე მომხდარ არაერთ ინციდენტზე, რომელთა შედეგადაც დაიღუპა 11 სამართალდამცავი, 10 სამოქალაქო პირი და დაშავდა 90-ზე მეტი ადამიანი.
საქართველოს ოკუპირებულ ტერიტორიებზე უსაფრთხოების თვალსაზრისით შექმნილ მდგომარეობას კიდევ უფრო ართულებს ის ფაქტი, რომ რუსეთის წინააღმდეგობის შედეგად, ფუნქციონირება შეწყვიტეს გაეროსა და ეუთო-ს მისიებმა, რომელთა აღდგენა დღემდე ვერ ხერხდება.

3. ჰუმანიტარული დახმარებისთვის თავისუფალი მიმოსვლის უზრუნველყოფა
რუსეთის საოკუპაციო ძალები და უსაფრთხოების ფედერალური სამსახურის თანამშრომლები მუდმივად ბლოკავენ ცხინვალის რეგიონსა და მიმდებარე სოფლებში ჰუმანიტარული ტვირთის შეტანას. რუსეთის ფედერაცია და მარიონეტული რეჟიმები განაგრძობენ ჰუმანიტარული საკითხის პოლიტიზაციას ჰუმანიტარული მისიების წინაშე მიუღებელი, უკანონო შეზღუდვების დაწესების გზით.

4. საქართველოს შეიარაღებული ძალები უნდა დაბრუნდნენ მუდმივი დისლოკაციის ადგილებში
2008 წლის 10 აგვისტოს საქართველოს მხარემ ცალმხრივად განაცხადა ცეცხლის შეწყვეტის შესახებ. საქართველოს შეიარაღებული ძალები დაუბრუნდნენ მუდმივი დისლოკაციის ადგილებს ჯერ კიდევ 2008 წლის 12 აგვისტოს ცეცხლის შეწყვეტის შეთანხმების ხელის მოწერამდე. საქართველო ერთგული რჩება 2008 წლის 12 აგვისტოს შეთანხმებით ნაკისრი ვალდებულებების. აღნიშნული არა ერთგზის დაფიქსირდა ევროკავშირის მონიტორინგის მისიის მიერ. უფრო მეტიც, ქართულმა მხარემ ცალმხრივად გააფორმა თანამშრომლობის მემორანდუმები ევროკავშირის მონიტორინგის მისიასთან, რითიც შეზღუდა სამხედრო ტექნიკისა და პერსონალის გადაადგილება ოკუპირებული ხაზის მიმდებარე ტერიტორიებზე. რუსეთს დღემდე რეაგირება არ მოუხდენია ევროკავშირის მონიტორინგის მისიის მოწოდებაზე ანალოგიური მემორანდუმის გაფორმებასთან დაკავშირებით.

5. რუსეთის შეიარაღებული ძალები უნდა დაბრუნდნენ სამხედრო მოქმედებების დაწყებამდე არსებულ პოზიციებზე. საერთაშორისო მექანიზმების შექმნამდე, რუსეთის სამშვიდობო ძალები განახორციელებენ უსაფრთხოების დროებით ზომებს
2008 წლის 12 აგვისტოს ცეცხლის შეწყვეტის შეთანხმების ხელმოწერის შემდეგ, რუსეთის შეიარაღებულმა ძალებმა მოახდინეს საქართველოს დამატებითი, საბრძოლო მოქმედებების მიღმა არსებული ტერიტორიების ოკუპაცია - ახალგორის რეგიონი, სოფელი პერევი და ზემო აფხაზეთი. რუსეთი არათუ არ ასრულებს საერთაშორისო საზოგადოების წინაშე ნაკისრ ვალდებულებებს, არამედ განაგრძობს სამხედრო კონტიგენტის გაზრდას საქართველოს ოკუპირებულ ტერიტორიებზე და აშენებს სამხედრო ბაზებს არალეგალური ყოფნის გამტკიცების მიზნით (5 ბაზა, 10 000 სამხედრო). ნიშანდობლივია, რომ რუსეთის წინააღმდეგობის გამო, დღეს არსებული ერთადერთი საერთაშორისო მექანიზმი, ევროკავშირის მონიტორინგის მისია ვერ ახორციელებს მანდატით მინიჭებულ უფლებამოსილებას საქართველოს ოკუპირებულ ტერიტორიებზე.

6. საერთაშორისო მოლაპარაკებების დაწყება აფხაზეთსა და სამხრეთ ოსეთში უსაფრთხოებისა და სტაბილურობის პირობების თაობაზე
საერთაშორისო სამართლის პრინციპებისა და ნორმების უხეში დარღვევით, რუსეთის ფედერაციამ ცალმხრივად აღიარა საქართველოს რეგიონების - აფხაზეთისა და ცხინვალის/სამხრეთ ოსეთის დამოუკიდებლობა, რითიც წინასწარ მოახდინა მათი უსაფრთხოებისა და სტაბილურობის შესახებ მოლაპარაკებათა ფარგლებში პროგრესის შეფერხება.
რუსეთის მიზანმიმართული არაკონსტრუქციული მიდგომა საფრთხეს უქმნის 2008 წლის 8 სექტემბრის შეთანხმების საფუძველზე შექმნილი ჟენევის მოლაპარაკებათა ფორმატს და შეუძლებელს ხდის მის ფარგლებში კონკრეტული შედეგების მიღწევას.