სახელმწიფომ უნდა გაატაროს ყველა ზომა, რომ 17 მაისს ნებისმიერი პირის მშვიდობიანი შეკრების უფლება იყოს დაცული, - ამის შესახებ საქართველოს სახალხო დამცველმა ნინო ლომჯარიამ პარლამენტთან გამართულ აქციასთან დაკავშირებით განაცხადა.
მისი თქმით, ლგბტ თემი არის ყველაზე მოწყვლადი ჯგუფი საქართველოში, რომელიც ყველაზე ხშირად ექვემდებარება დისკრიმინაციას.
„თუ დაირღვევა რომელიმე უმცირესობის წარმომადგენლის უფლება, რა თქმა უნდა, სახალხო დამცველი იქნება პირველი, რომელიც თითოეული მათგანის უფლებას დაიცავს. ჩვენ სახალხო დამცველის ანგარიშშიც ვსაუბრობთ ამ პრობლემაზე – ზოგადად, ლგბტ თემი არის ყველაზე მოწყვლადი თემი საქართველოში, რომელიც ყველაზე ხშირად ექვემდებარება დისკრიმინაციას.
რაც შეეხება 17 მაისის აღნიშვნას, ამ შემთხვევაში, ვფიქრობ, სახელმწიფომ უნდა გაატაროს ყველა ზომა, რომ ნებისმიერ პირს ჰქონდეს მშვიდობიანი შეკრების და გამოხატვის უფლება დაცული“, – განაცხადა ლომჯარიამ.
შეგახსენებთ, "ლგბტ უფლებები ადამიანის უფლებებია!" - ამ ლოზუნგით თბილისში პარლამენტის შენობასთან აქცია გაიმართა.
აქციის მონაწილეები პარლამენტის ადამიანის უფლებათა დაცვის კომიტეტის თავმჯდომარის პოზიციიდან სოფო კილაძის გათავისუფლება მოითხოვეს.
აქციის მონაწილეების განცხადებით, სოფო კილაძის საქმიანობა და ღირებულებები ადამიანის უფლებებისა და თანასწორობის პრინციპებს არ შეესაბამება.