„გიორგის კოორდინატები მე არ მაქვს, რას და როგორ გეგმავს, ჩემთვის უცნობია. არ შვეხმიანებივარ, არც თვითონ შემხმიანებია, აქედან გამომდინარე, არაფრის თქმა შემიძლია“, - განაცხადა „ჯი-ეიჩ-ენთან“ გუდაურში სრიალიასას დაღუპული 12 წლის სალომე ტატიშვილის საქმეზე მსჯავრდებულის ადვოკატმა, თენგიზ ხარებავამ.
მიუხედავად მის მიმართ გამოტანილი გამამტყუნებელი განაჩენისა, ჩამოვა თუ არა ლიპარტელიანი საქართველოში, ეს ცნობილი არ არის. ის სწავლის მიზნით ჩეხეთში იმყოფება.
ადვოკატებს სააპელაციო სასამართლოს მიერ გამოტანილი განაჩენი ჯერ არ ჩაბარებიათ. ისინი მოსამართლეთა კოლეგიის მიერ გამოტანილი გამამტყუნებელი განაჩენის გასაჩივრებას უზენაეს სასამართოლში გეგმავენ.
„გასაჩივრებას იმ შემთხვევაში ვაპირებთ, თუ სამოტივაციო ნაწილი მიუღებელი იქნება. დარწმუნებული ვარ, ჩვენთვის მიუღებელი იქნება, რადგან მოსამართლე ვერ დაადატურებს აღნიშნულ ფაქტობრივ გარემოებას, რაზეც განაჩენი დადგინდა“, - დასძენს ადვოკატი.
ცნობისთვის, გუდაურში, სრიალისას დაღუპული 12 წლის სალომე ტატიშვილის საქმეზე თბილისის სააპელაციო სასამართლოს მოსამართლეთა კოლეგიამ პირველი ინსტანციის სასამართლოს გადაწყვეტილება შეცვალა და გიორგი ლიპარტელიანი დამნაშავედ ცნო.
ლიპარტელიანს სსკ-ის 116-ე მუხლით, რაც გაუფრთხილებლობით სიცოცხლის მოსპობას ითვალისწინებს, 3 წლით პატიმრობა მიესაჯა.
სალომე ტატიშვილს 2016 წლის 10 იანვარს გუდაურში, სრიალისას, თხილამურებზე მდგომი 18 წლის გიორგი ლიპარტელიანი დაეჯახა. მოზარდი სიცოცხლისთვის შეუთავსებელი ტრავმებით ადგილზე გარდაიცვალა, თავად ლიპარტელიანმა კი, მსუბუქი დაზიანებები მიიღო. ტატიშვილის გაურთხილებლობით სიცოცხლის მოსპობაში ბრალდებული, ლიპარტელიანი 2017 წლის 29 დეკემბერს თბილისის საქალაქო სასამართლომ უდანაშაულოდ ცნო. აღნიშნული გადაწყვეტილება მოსამართლე ბესიკ ბუგიანიშვილმა მიიღო.
