იმედი გვაქვს, რომ საქართველოს თავდადება და მტკიცე არჩევანი, რომელიც ჩვენ გავაკეთეთ, იქნება შესაბამისად ასახული, - ამის შესახებ საქართველოს პრეზიდენტმა გიორგი მარგველაშვილმა ნატო-საქართველოს სახალხო დიპლომატიის ფორუმზე სიტყვით გამოსვლისას განაცხადა.
მისი თქმით, ის წარმატებული გზა, რომელიც საქართველოს აქვს ამ ალიანსში წევრობისთვის, ქვეყნის სურვილია, რომ კიდევ უფრო გაღრმავდეს.
„ჩვენ ძალიან რთულ ვითარებაში ვართ, იმიტომ, რომ მიმდინარეობს ბევრი თვალსაზრისით რთული გეოპოლიტიკური დაპირისპირება და რაც მთავარია, პროპაგანდისტული დაპირისპირება ალიანსთან და იმ ღირებულებებთან, რომელიც თითოეულ ჩვენგანს აერთიანებს.
რატომ უნდათ ქართველებს ასე ძალიან ნატო-ში გაერთიანება და რითი არიან ისინი ამ გზაზე ასე წარმატებულები? პირველ რიგში იმდენად, რამდენადაც ჩვენ ვერთიანდებით იმ ღირებულებებით, რა ღირებულებებითაც გაერთიანებული არიან ნატოს ქვეყნები - ადამიანის თავისუფლება, დემოკრატია.
ამასთან ერთად, ნატო ყველაზე წარმატებული სამხედრო ალიანსია. ნატო-მ შეძლო და ყველაზე დიდი დაპირისპირება კაცობრიობის ისტორიაში, ცივი ომი, ბრძოლის და მსხვერპლის გარეშე დაამთავრა. მაგრამ დღეს გასააზრებელია ის რთული გარემო, რომელშიც ჩვენ ვიმყოფებით - ახალი ფაზის წინ ცივი ომის ინიცირების მცდელობისა. სწორედ ეს პოლიტიკა იქნა დეკლარირებული რუსეთის მიერ და ეს პოლიტიკა ჩვენთვის განსაკუთრებით შემაშფოთებელია.
ჩვენ მივესალემებით იმ პოლიტიკას, რომელიც არსებობს ნატოში ამ პოლიტიკის საპირწონედ.
ის წარმატებული გზა, რომელიც ჩვენ გვაქვს ამ ალიანსში წევრობისთვის, გვინდა, რომ კიდევ უფრო გაღრმავდეს. იმედი გვაქვს, რომ საქართველოს თავდადება და მტკიცე არჩევანი, რომელიც ჩვენ გავაკეთეთ, იქნება შესაბამისად ასახული.
ასეთი ორგანიზებული შეკრებები, რომელზეც ჩვენ ვგეგმავთ ნაბიჯებს, ნამდვილად სწორი პასუხია პროპაგანდისტული ომის წინააღმდეგ“, - განაცხადა პრეზიდენტმა.