ანტიდასავლური პროპაგანდა და დეზინფორმაცია არის გამოწვევა არა მხოლოდ საქართველოსთვის, არამედ ნატო-სა და ევროკავშირის პარტნიორი ქვეყნებისთვის, - ამის შესახებ საგარეო საქმეთა მინისტრმა მიხეილ ჯანელიძემ ნატო-საქართველოს სახალხო დიპლომატიის ფორუმზე სიტყვით გამოსვლისას განაცხადა.
მისი თქმით, ძალიან მნიშვნელოვანია მოსახლეობას ჰქონდეს სრული ინფორმაცია ნატო-ს, ევროკავშირისა და იმ სიკეთეების შესახებ, რასაც საქართველოს აღნიშნული ორგანიზაციებში გაწევრიანება მოუტანს.
“კვლევების თანახმად, საქართველოს ნატო-ში გაწევრიანებას ქვეყნის მოსახლეობის უმეტესობა უჭერს მხარს და ამის პარალელურად მიმდინარეობს ღია თუ ფარული ანტიდასავლური პროპაგანდა და ნატო-ს საწინააღმდეგო კამპანია, რომლის მიზანია საზოგადოებაში გარკვეული უნდობლობის და ნიჰილიზმის დანერგვა. აღნიშნული კამპანიის ავტორებს კარგად ესმით, რომ ერთის მხრივ ნატო და მეორეს მხრივ, საქართველო აუცილებლად შეასრულებენ ნაკისრ ვალდებულებებს და საქართველო გახდება ნატო-ს წევრი. ამიტომ, მაქსიმალურად ცდილობენ ამ შეუქცევადი პროცესისთვის ხელის შეშლას. ანტიდასავლური პროპაგანდა და დეზინფორმაცია არის გამოწვევა არა მხოლოდ საქართველოსთვის, არამედ ნატო-სა და ევროკავშირის პარტნიორი ქვეყნებისთვის. არსებული ვითარება და ჩვენი ქვეყნის მიერ არჩეული დასავლური გზა მოითხოვს კიდევ უფრო მეტ ძალისხმევას, რათა საქართველო ღირსეულად გაუმკლავდეს გამოწვევებს და მოძებნოს შესაძლებლობები სტაბილური განვითარებისთვის. სწორედ ამიტომ, ძალიან მნიშვნელოვანია მოსახლეობას ჰქონდეს სრული ინფორმაცია ნატო-ს, ევროკავშირისა და იმ სიკეთეების შესახებ, რასაც საქართველოს აღნიშნული ორგანიზაციებში გაწევრიანება მოუტანს“, - განაცხადა მიხეილ ჯანელიძემ.