2010 წლის ივნისში სამომხმარებლო ფასების საერთო დონე მაისის მაჩვენებელთან შედარებით 0.3 პროცენტით შემცირდა. საქართველოს სტატისტიკის ეროვნული სამსახურის ინფორმაციით 2009 წლის ივნისში, მაისთან შედარებით სამომხმარებლო ფასების დონე არ შეცვლილა.
შედეგად, 2010 წლის ივნისში წლიური ინფლაცია წინა თვეში დაფიქსირებული 4 პროცენტიდან 3.7 პროცენტამდე შემცირდა. საშუალო წლიური ინფლაციის მაჩვენებელი ივნისში 0.1 პროცენტული პუნქტით გაიზარდა და 2.8 პროცენტს მიაღწია.
ივნისის ინფლაციაზე მნიშვნელოვანი იყო სეზონური ფაქტორების
შედეგად ბოსტნეულზე, რძის პროდუქტებსა და ხორცპროდუქტებზე ფასების ცვლილების გავლენა. ფასები შემცირდა კარტოფილზე, პომიდორზე, მწვანე ლობიოზე, კომბოსტოზე, ასევე კვერცხზე, ქათმის ხორცსა და ყველზე. ხოლო ფასების ზრდა შეიმჩნეოდა სისხლძარღვთა
გამაფართოებელ მედიკამენტებზე, ანტიბიოტიკებზე, ზეთზე და წიწიბურაზე.
ივნისში ფასების ზრდა დაფიქსირდა კატეგორიებზე: „ჯანმრთელობის დაცვა", „საცხოვრებელი სახლი, წყალი, ელექტროენერგია, აირი და სათბობის სხვა სახეები" და „განათლება". რაც შეეხება თვის საბაზო ინფლაციებს, ორი სტანდარტული გადახრის ფარგლებში მოხვედრილი პროდუქტებისათვის (მთელი კალათის 94.7 პროცენტი) თვის საბაზო ინფლაცია 0.4 პროცენტს შეადგენს. ხოლო ერთი სტანდარტული გადახრის ფარგლებში მოხვედრილი პროდუქტებისთვის (მთელი კალათის 83.4 პროცენტი) აღნიშნული მაჩვენებელი 0.6 პროცენტია.
წლიური საბაზო ინფლაციის მაჩვენებლები 2.2 და 2.1 პროცენტს შეადგენს, შესაბამისად, ორი და ერთი სტანდარტული გადახრის ფარგლებში მყოფი პროდუქტებისათვის.
წლიური სფი და საბაზო ინფლაცია (2009 წლის დეკემბრიდან მოქმედი სამომხმარებლო კალათის 266 კომპონენტის მიხედვით) როგორც უკვე აღვნიშნეთ, 2010 წლის ივნისის წინა წლის შესაბამის თვესთან შედარებით სამომხმარებლო კალათის ფასები 3.7 პროცენტით გაიზარდა. წლიური ინფლაციის ზრდა ძირითადად გამოწვეულია შაქარზე და საკონდიტრო ნაწარმზე (23.4 პროცენტით), პურპროდუქტებზე (3.6 პროცენტით), ხორცპროდუქტებზე (3.7 პროცენტით), ასევე განათლებაზე (51.0 პროცენტით), ტრანსპორტზე (11.8 პროცენტით), ჯანმრთელობის დაცვაზე (5.3 პროცენტით), ასევე ბენზინსა და დიზელზე (41.5 და 53.7 პროცენტით შესაბამისად) ფასების ზრდით. ამას გარდა, ფასის ზრდა დაფიქსირდა კატეგორიებზე: „ალკოჰოლური სასმელები, თამბაქო" და „საცხოვრებელი სახლი, წყალი, ელექტროენერგიააირი და სათბობის სხვა სახეები" _ 5.7 და 1.8 პროცენტით შესაბამისად.
ფასები შემცირდა ბოსტნეულზე (7.6 პროცენტით), ასევე ფასების კლების ტენდენცია შეინიშნება კატეგორიაზე „ტანსაცმელი და ფეხსაცმელი" (8.4 პროცენტით). ივნისის თვეში იმპორტირებულ საქონელზე წლიური ინფლაციის მაჩვენებელმა 7.3 პროცენტი შეადგინა. აღსანიშნავია, რომ ერთწლიანი ფასების კლების შემდეგ, ბოლო 5 თვის მანძილზე იმპორტირებულ პროდუქტზე დადებითი ინფლაცია ფიქსირდება, რაც საერთაშორისო ბაზრებზე ფასების ზრდის ტენდენციის შედეგია. ადგილობრივი საქონელის ინფლაციამ 2.2 პროცენტი შეადგინა. ამავე პერიოდში არასავაჭრო საქონელზე ფასების ინფლაციამ 3.3 პროცენტი შეადგინა, ხოლო სავაჭრო საქონელზე წლიური ინფლაცია 3.6 პროცენტი დაფიქსირდა.
საქონლის მოხმარების ხანგრძლივობის მიხედვით განხილვა გვიჩვენებს, რომ 2010 წლის ივნისში წინა თვესთან შედარებით ფასები შემცირდა ხანმოკლე მოხმარების საქონელზე (0.7 პროცენტით), ხოლო ფასების ზრდა დაფიქსირდა საშუალო და ხანგრძლივი მოხმარების საქონელზე (0.1 და 2.4 პროცენტით შესაბამისად). მომსახურებაზე ფასების დონე 0.4 პროცენტით გაიზარდა. სხვადასხვა ხანგრძლივობის მოხმარების საქონელს შორის წლიური ინფლაციის მაჩვენებელი ხანმოკლე მოხმარების საქონლისათვის შეადგენს 2.9 პროცენტს, საშუალო ხანგრძლივობის მოხმარების საქონელისთვის აღნიშნული მაჩვენებელ -6.1 პროცენტია, ხოლო ხანგრძლივი მოხმარების საქონელისთვის აღნიშნული მონაცემი 5.9 პროცენტს გაუტოლდა. მომსახურებაზე ფასები გაიზარდა 7.4 პროცენტით.