ამ ეტაპზე, გამიჭირდება საკანონმდებლო ცვლილებაზე კონკრეტულად ლაპარაკი, თუმცა ეს იქნება მიმართული პასპორტის გაცემასთან დაკავშირებით, სახელისა და გვარის გამოცვლა გართულდება, ასევე რეადმისირებული მოსახლეობის მიმართაც იგეგმება გარკვეული ჯარიმების დაწესება, - ამის შესახებ საქართველოს საგარეო საქმეთა მინისტრის მოადგილე ვახტანგ მახარობლიშვილმა ჟურნალისტებს განაცხადა.
მისი თქმით, დაგეგმილია საინფორმაციო კამპანიის მესამე ტალღა, რომლის მთავარი მიზანი იქნება, მოქალაქეებს მაქსიმალურად მიაწოდონ ინფორმაცია, რათა მათ ისეთი ნაბი არ გადადგან, რომელიც კიდევ უფრო დააზიანებს თუნდაც მათ პირად ფინანსურ მდგომარეობას.
„რეადმისიის კუთხით აუცილებლად უნდა აღვნიშნოთ, რომ საქართველო ძალიან წარმატებულად თანამშრომლობს პარტნიორებთან, 95% პროცენტზე მაღალი მაჩვენებელი გვაქვს ჩვენი რეადმისირებული მოქალაქეების.
დანაშაულის შემცირების კუთხით ზომების გატარებას რაც შეეხება, მნიშვნელოვანი იქნება, უფრო აქტიურად ვითანამშრომლოთ ევროპელ პარტნიორებთან. პოლიციის ატაშეების ინსტიტუტმა ძალიან კარგად იმუშავა, მაგრამ მნიშვნელოვანია, კიდევ უფრო მეტად მოხდეს ინფორმაციების გაცვლა, ამ კუთხით შსს-ს მინისტრის ვიზიტები იგეგმება მთელ რიგ ევროპულ ქვეყნებში“, – განაცხადა ვახტანგ მახარობლიშვილმა.
