ტყუილის თქმა არ ეკადრება არავის, მით უმეტეს ჟურნალისტს, - ამის შესახებ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა აზერბაიჯანელი ჟურნალისტის აფგან მუხთარლის ბოლო დროს გაკეთებულ განცხადებებთან დაკავშირებით განაცხადა.
მისი თქმით, თბილისის ცენტრიდან ადამიანის გატაცების ვერსია აბსურდია, რადგან რაიმე მსგავსი ფაქტი რომ მომხდარიყო, მას ბევრი თვითმხილველი ეყოლებოდა.
„როცა ადამიანი ციხეშია, კარგად მესმის, მას შეიძლება ბევრი რამ აწუხებდეს, მაგრამ ყოველ შემთხვევაში ტყუილის თქმა არ ეკადრება არავის, მითუმეტეს ჟურნალისტს, რომელსაც ჟურნალისტურ გამოძიებაზე აქვს პრეტენზია. ეს არის ძალიან არასერიოზული განცხადებები, რომელიც მან გააკეთა“, - განაცხადა სოზარ სუბარმა.
