მშენებლობებთან მიმართებაში სიტყვა „მახინჯი“ არ უნდა იქნას გამოყენებული, რადგან ეს სუბიექტური დამოკიდებულებაა, - ამის შესახებ თბილისის ყოფილმა მერმა გიგი უგულავამ დედაქალაქში მიმდინარე მშენებლობებზე საუბრისას, "რუსთავი 2"-ის გადაცემა "არჩევანაში" განაცხადა.
მისი თქმით, ქაოტური მშენებლობების გარდა, თბილისში არის უამრავი ძველი ნაგებობა, რომელსაც აქვს ექსპულატაციის ვადა გასული და იქ ხალხი ცხოვრობს. მისივე თქმით, თუ შესაბამისი სტანდარტები იქნება, თბილისში მაღალი შენობაც უნდა აშენდეს.
„მე ვერ გავიზიარებ იმ დანერგილ ფობიას, რომ მაინცდამაინც მაღალი შენობა არ უნდა აშენდეს თბილისში. თუ შესაბამისი სტანდარტებით აშენდება, უნდა აშენდეს“, - განაცხადა გიგი უგულავამ.
უგულავას განცხადებით, მისი მერობის დროს, ასე მწვავედ ეკოლოგიურ პრობლემებს დედაქალაქში არ აყენებდნენ, რადგან მაშინ სხვა საჭიროებები იყო, მათ შორის იყო ე.წ. ბუნკერები, ნაგავსაყრელები, უგზოობა და ა.შ. თუმცა, დღეს თბილისის ახალი გამოწვევების წინაშე დგას.
თბილისის ყოფილი მერი აქვე აღნიშნავს, რომ მშენებლობები 20%-ია ქვეყნის ეკონომიკის და ამ თემას საკმაოდ სენსიტიურად უნდა მოეკიდოს ყველა.
მისივე თქმით, ვაკესა და საბურთალოში გადატვირთულია შენობები, ამიტომ ერათადერთი გამოსავალია, რომ სამშენებლო ვექტორი მარცხენა სანაპიროზე გადავიდეს და ამისთვის საჭიროა ქალაქის გენგეგმა.
„ჩვენ ვხედავთ ტენდენციას, რომ უქმდება ყველა პროფესიული საბჭო, რაც იმას ნიშნავს, რომ მერმა ერთპიროვნულად უნდა მიიღოს გადაწყვეტილება, რაც არასწორია, პრაგმატულადაც არასწორია, მათ შორის, თავად კალაძისთვის“, - განაცხადა უგულავამ, რომელმაც აქვე კახა კალაძეს პროფესიონალების რეკომენდაციების გათვალისწინებისკენ მოუწოდა.