ზურაბ ადეიშვილის ნარჩენებისგან სასამართლო უნდა გაიწმინდოს! ეს ის ნარჩენებია, თვითონ ზურასაც რომ ასამართლებენ დღეს და სამართლიანი სასამართლოს გარეშე ტოვებენ, - ამის შესახებ სამაუწყებლო კომპანია "რუსთავი 2"-ის გენერალური დირექტორი ნიკა გვარამია Facebook-ის პირად გვერდზე წერს.
მისი თქმით, ის იზიარებს მოსაზრებას, რომ ადეიშვილის პროკურორობისა და მინისტრობის დროს, სასამართლო მისი გავლენის ქვეშ იყო
"პირველი - ზურა ადეიშვილზე ახლო მეგობარი მე არ მყავს. მივიჩნევ, რომ საქართველოს ისტორიაში ყველზე ღირსშესანიშნავი საჯარო მოხელე იყო. იუსტიციის მინისტრი მეც ვიყავი, მაგრამ ზურაზე უკეთესი იუსტიციის მინისტრი საქართველოს არ ყოლია. მიუხედავად ამისა, სრულიად ვიზიარებ იმას, რომ მისი პროკურორობის და მინისტრობის დროს, სასამართლო მისი გავლენის ქვეშ იყო და ეს იყო მძიმე შეცდომა ზურასიც და უფრო მეტად, სახელმწიფოშო. დიახ, ზურას ნარჩენებისგან სასამართლო უნდა გაიწმინდოს! ეს ის ნარჩენებია, თვითონ ზურასაც რომ ასამართლებენ დღეს და სამართლიანი სასამართლოს გარეშე ტოვებენ", - წერს გვარამია.
მისივე თქმით, ის ანა დოლიძეს სასამართლო სისტემის ერთადერთ ნათელ წერტილად მიიჩნევს. როგორც გვარამია წერს, ის, რაც ახლა ანა დოლიძის თავს ხდება, არის სრულიად არნახული კლანური შურისძიება, არა მარტო ამორალური და არაკოლეგიალური, სრულიად უკანონო და დანაშაულებრივიც.
"მეორე - ანა დოლიძის და ჩემი ურთიერთობა ყოველთვის გამოირჩეოდა ურთიერთდაპირისპირებით და, ამავე დროს, ურტიერთპატივისცემით. დღეს მინდა ვაღიარო, რომ სასამართლო სისტემასთან დაკავშირებული მისი კრიტიკა (არა მარტო მაშინდელი სახელმწიფო სისტემის, არამედ პირადად ჩემს მიმართაც) სრულიად ლეგიტიმური და ადეკვატური იყო. ყველაფერს დღესაც არ ვიზიარებ, თუმცა ბევრ რამეში ის სრულიად მართალი იყო და რუსთავი 2-ის საქმემ ეს ნათლად დაგვანახა ყველას. გამოვხატავ სრულ მხარდაჭერას მის მიმართ და მივიჩნევ სასამართლო სისტემის ერთადერთ ნათელ წერტილად! ის, რაც ახლა მის თავს ხდება, არის სრულიად არნახული კლანური შურისძიება, არა მარტო ამორალური და არაკოლეგიალური, სრულიად უკანონო და დანაშაულებრივიც", - აღნიშნავს გვარამია.
ცნობისთვის, ანა დოლიძემ დღეს განაცხადა, რომ ადეიშვილის ნარჩენები ცდილობენ, სასამართლოზე გავლენა შეინარჩუნონ. რის საპასუხოდაც, საბჭოს წევრმა გიორგი მიქაუტაძემ განაცხადა, რომ ანა დოლიძე ცდილობს, პოლიტიკური განცხადებით შეურაცხყოს კოლეგები.