მე პირადად მიმაჩნია, რომ თუ ჩვენ უნდა ჩამოვაყალიბოთ დამოუკიდებელი სასამართლო, მე მივიჩნევ ჩემს მოვალეობად ამ [ზურაბ ადეიშვილის] სისტემის დანგრევას, – ასე გამოეხმაურა იუსტიციის უმაღლესი საბჭოს წევრი ანა დოლიძე კოლეგების ბრალდებას, რომ საბჭოს არამოსამართლე წევრი პრეზიდენტის დაკვეთას ასრულებს.
დოლიძის განცხადებით, ადეიშვილის სასამართლო სისტემა შეიქმნა იმისთვის, რომ კონკრეტულ მოსამართლეებზე გავლენა ჰქონოდა.
„მე დღეს დილას განვაცხადე, რომ კვლავ არის მცდელობა, სასამართლო იმართებოდეს ზურაბ ადეიშვილის სისტემის მიერ შექმნილი სისტემის ნარჩენებით. ეს სისტემა ჩამოყალიბდა მოსამართლეების სამართავად. კონკრეტული პიროვნებების მეშვეობით ხდებოდა მოსამართლეებზე ზეგავლენა. სამწუხაროდ, ეს სისტემა არ დანგრეულა, მისი საცეცები კვლავ არსებობს და ეს სისტემა არის ჩამოყალიბებული სწორედ ზურაბ ადეიშვილი მიერ და დროს. მე პირადად მიმაჩნია, რომ თუ ჩვენ უნდა ჩამოვაყალიბოთ დამოუკიდებელი სასამართლო, მე მივიჩნევ ჩემს მოვალეობად ამ სისტემის დანგრევას“, – განაცხადა ანა დოლიძემ.
ცნობისთვის, ანა დოლიძემ დღეს განაცხადა, რომ ადეიშვილის ნარჩენები ცდილობენ, სასამართლოზე გავლენა შეინარჩუნონ. რის საპასუხოდაც, საბჭოს წევრმა გიორგი მიქაუტაძემ განაცხადა, რომ ანა დოლიძე ცდილობს, პოლიტიკური განცხადებით შეურაცხყოს კოლეგები.
