„მესმის პროკურორების და საგამოძიებო ორგანოსი, რომელთაც სურთ აჩვენონ, თითქოს, საქმე იდეალურადაა გამოძიებული და ყველაფერი დადგენილია. თუმცა, მათი განცხადებები და ის მტკიცებულებები, რომელიც საქმეშია, დაჯერების საფუძველს არ იძლევა“, - ასე ეხმაურება "ჯი-ეიჩ-ენთან" მთავარი პროკურორის, ირაკლი შოთაძის განცხადებას ხორავას ქუჩაზე მოზარდების მკვლელობის საქმეში ერთ-ერთი ბრალდებული არასრულწლოვანის ადვოკატი, ტარიელ კაკაბაძე.
შოთაძის განცხადებას, რომ 51-ე სკოლის მოსწავლეების მკვლელობის საქმე სრულყოფილად არის გამოძიებული და რომ დაცვის მხარის განცხადებები საზოგადოების შეცდომაში შეყვანას ემსახურება, ადვოკატი კითხვებით პასუხობს.
„ბრალდების მხარე თავის არასანდო, არადამაჯერებელ მტკიცებულებებზე დაყრდნობით კატეგორიულად მიუთითებს მხოლოდ 2 დანაზე და 2 ადამიანზე. მაინტერესებს, როგორი იქნება ბრალდების მხარის პოზიცია და რას იტყვის, როცა დადგინდება, რომ გარდაცვლილის მიმართ გაცილებით მეტი დანა იქნა გამოყენებული?
რამდენად სანდოა იმ მოწმის ჩვენება, რომელიც ერთიდაიმავე ფაქტთან დაკავშირებით, ერთ დღეს ერთს ამბობს, მეორე დღეს მეორეს და ფაქტობრივად ჩვენებას ცვლის? ასევე, რამდენად უტყუარია მოწმეთა ჩვენებები, რომლებიც განსხვავებულად აღწერენ ერთსა და იმავე ფაქტებს?“- აცხადებს კაკაბაძე.
ადვოკატის განმარტებით, ბრალდების მხარის მიერ მოპოვებული მტკიცებულებები არადამაჯერებელია, რადგან თავის დროზე საგამოძიებო უწყებამ იჩქარა.
„მთელი რიგი უმნიშვნელოვანესი ფაქტები, გარემოებები დაუდგენელია. ის კითხვები, რომელიც მოცემულ საქმესთან დაკავშირებით საზოგადოებას აწუხებს, საქმეში არსებული მტკიცებულებებით პასუხგაცემული არ არის. მოწმეთა ჩვენებები და ექსპერტიზის დასკვნები, რომელიც ბრალდებას აქვს წარმოდგენილი, აბსოლუტურად ურთიერთსაწინაღმდეგოა.
იმისათვის, რომ საქმეზე ჭეშმარიტება დადგინდეს, დაცვის მხარემ უამარავი კომპლექსური ექსპერტიზა დავნიშნეთ. ექსპერტმა უნდა გასცეს მთავარ კითხვას პასუხი, თუ რამდენი სხვადასხვა დანით მიაყენეს გარადცვლილს დაზიანებები.
თავის დროზე საგამოძიებო ორგანომ იჩქარა და ბევრი შეცდომა დაუშვა. დაკითხულმა კონკრეტულმა პირებმა საგამოძიებო ორგანო შეცდომაში შეიყვანეს, შესაბამისად, ისინი არასწორ გზას დაადგნენ. სწორედ ამის გამო მივიღეთ, ფაქტობრივად გამოუძიებელი სისხლის სამართლის საქმე. იმედი მაქვს და მჯერა, რომ სასამართლოში ჭეშმარიტება დადგინდება და სასამართლოს განაჩენით მაინც მოეფინება ნათელი ძალიან ბევრ ბუნდოვანებას“, - აცხადებს კაკაბაძე.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი საავადმყოფოში მიყვანამდე გარდაიცვალა, მეორე კი, მოგვიანებით, საავადმყოფოში.
მომხდარი მკვლელობის ფაქტზე სამართალდამცავებმა 2 დკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით,პატიმრობა შეუფარდა.
პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს- ყოფილი თანამშრომელია. პასუხისგებაში მიცემულთაგან მხოლოდ სამი დააკავეს,რადგან ორ პირზე არასრულწლოვანთა მართლმსაჯულების კოდექსი ვრცელდება.
