"შრომის უსაფრთხოების საკითხი და შრომითი უფლებების დაცვა ჩვენი კომიტეტის ერთ-ერთი უმნიშვნელოვანესი მიმართულებაა", - ამის შესახებ პარლამენტის ადამიანების უფლებათა კომიტეტის თავმჯდომარემ, სოფიო კილაძემ დღევანდელი სხდომის დასრულების შემდეგ განაცხადა.
კილაძის თქმით, აპრობირებული დასავლური პრაქტიკაა, როცა როგორც დასაქმებულის, ისე ბიზნესის ინტერესები თანაბრადაა დაცული.
,,ძალიან ხშირად ვხედავთ სხვადასხვა ტრაგედიებს, სამუშაო ადგილებზე, ეს არის თითოეული ჩვენგანის ტრაგედია და არა მხოლოდ დაღუპულთა და დაშავებულთა ოჯახების. ვმუშაობთ იმაზე, რომ ასეთი ტრაგედიები რაც შეიძლება შემცირდეს. სამწუხაროდ, ყველა ქვეყანაში ხდება ასეთი ტრაგედიები. ჩვენი მოვალეობა არის, რომ ეს ყველაფერი დავიყვანოთ მინიმუმდე. პირველ რიგში, უმნიშვნელოვანესია, შევინარჩუნოთ მყარი სამართლებრივი გარანტიები იმისთვის, რომ დაცული იყვნენ, როგორც მუშაკები, ისე დაცული იყოს ბიზნესინტერესები. ეს არის აპრობირებული დასავლური პრაქტიკა, როცა არც ბიზნესინტერესებს ადგება ზიანი და არც დასაქმებულებს",- განაცხადა კილაძემ.
