პარლამენტის ადამიანის უფლებათა კომიტეტის თავმჯდომარე სოფიო კილაძე დემირელის კოლეჯის, მუსტაფა ემრე ჩაბუქის ექსტრადირების საკითხს ეხმიანება და აცხადებს, რომ ამ კონკრეტულ საკითხზე აქვს შინაგანი რწმენა, თუმცა სასამართლოს სამართლიანი გადაწყვეტილების მოლოდინშია.
“მე ამ კონკრეტულ საკითხზე მაქვს ჩემი შინაგანი რწმენა, მაგრამ როგორც ვიცით, მიმდინარეობს სასამართლო პროცესები და სასამართლომ უნდა მიიღოს გადაწყვეტილება ბატონ ჩაბუქთან მიმართებით. იმედი მაქვს, რომ სასამართლო მიიღებს კანონიერ და სამართლიან გადაწყვეტილებას. მე არ მინდა ჩემი პოზიციის დაფიქსირებით სასამართლიზე ზეწოლა გამომივიდეს”, - განაცხადა კილაძემ.
გადასცემს თუ არა, საქართველო თურქეთის რესპუბლიკას მუსტაფა ემრე ჩაბუქს, ამასთან დაკავშირებით თბილისის საქალაქო სასამართლო დღეს იმსჯელებს. პროკურატურამ სასამართლოს ჩაბუქის ექსტრადირების დასაშვებობასთან დაკავშირებით უკვე მიმართა.
იმ შემთხვევაში, თუკი, სასამართლო ექსტრადირების გადაწყვეტილებას მიიღებს, დაცვის მხარე აღნიშნულს უზენაეს სასამართლოში გაასაჩივრებს. ჩაბუქის ადვოკატებს ამისთვის ერთკვირიანი ვადა ექნებათ.
შეგახსენებთ, რომ დემირელის კერძო კოლეჯის ხარისხის მართვის მენეჯერი მუსტაფა ემრე ჩაბუქი 2017 წლის მაისში, თბილისში, თურქეთის მხარის მოთხოვნით დააკავეს.
