ფრაქცია “ერთიანი ნაციონალური მოძრაობის” წინადადების საფუძველზე, ჩანიშნული თბილისის საკრებულოს რიგგარეშე სხდომა კვორუმის არ არსებობის გამო ჩაიშალა. სხდომაზე არც თბილისის მთავრობის და არც საკრებულოს უმრავლესობა არ მივიდა. სხდომა დღეს ფრაქცია „ნაციონალური მოძრაობის“ უხუცესმა წევრმა ნიკა ვაჩეიშვილმა წაიყვანა.
ვაჩეიშვილის განცხადებით, ეს არის ტრაგი-კომედიური ვითარება, პასუხისმგებლიანი დეპუტატებით სავსე უნდა იყოს სხდომათა დარბაზი, თუმცა ნახევრად ცარიელია.
სხდომაზე ფრაქცია „ნაციონალური მოძრაობისა“ და „ევროპული საქართველოს“ დეპუტატებმა ფორმალურად რეგისტრაცია გაიარეს. სხდომაზე დასასწრებად მივიდა მეტრო “ვარკეთილში” ჭერის ჩამონგრევის შედეგად დაშავებული ორი ადამიანი.
სხდომის ჩაშლას გამოეხმაურა თბილისის საკრებულოს ფრაქციის „ქართული ოცნება – დემოკრატიული საქართველო“ თავმჯდომარის მოადგილე ვახტანგ შაქარიშვილი.
მისი თქმით, მმართველი გუნდის არც ერთ წარმომადგენელს „ნაციონალური მოძრაობის“ მიერ დადგმულ პოლიტიკურ წარმოდგენაში მონაწილეობის დრო არ აქვს.
დეპუტატი განმარტავს, რომ ვისაც მეტროსადგურ „ვარკეთილში“ მომხდარ შემთხვევასთან დაკავშირებით კითხვები ჰქონდა, საკითხის განხილვაში მონაწილეობის და პასუხების მიღების საშუალება პარასკევს გამართულ ორი კომისიის გაერთიანებულ სხდომაზე მიეცა.
„კომისიების გაერთიანებულ სხდომაზე ჩვენც და უმრავლესობის წევრებმაც ძალიან მწვავე კითხვები დავსვით. ამ განხილვაში ოპოზიციის ერთმა ნაწილმა, „ევროპულმა საქართველომ“ მიიღო მონაწილეობა. მათ საშუალება ქონდათ, კითხვები დაესვათ და მერიის მაღალჩინოსნებმა, შესაბამისი სამსახურების ხელმძღვანელებმა, ასევე თბილისის ვიცე-მერმა ამ კითხვებს პასუხები გასცეს“, – განაცხადა ვახტანგ შაქარიშვილმა.
