ადვოკატის ვარაუდით, ხვალ ალექსანდრე ბურჭულაძეს გამოკითხვაზე დაიბარებენ.
„რადგან პაატა ბურჭულაძეზე საქმეა აღძრული, ეს იმას არ ნიშნავს, რომ ყველაფერი უარყოფიად უნდა წავიდეს“, - განუცხადა „ჯი-ეიჩ-ენს“ ალექსნადრე ბურჭულაძის ადვოკატმა, მიხეილ რამიშვილმა.
მისი ვარაუდით, ბურჭულაძეს გამოკითხვაზე ხვალ დაიბარებენ.
„ალექსანდრეს განცხადებას დღეს გაეცნობიან, პრინციპში, ხვალისთვის მისი გამოკითხვა უნდა მოხდეს, მობილურ ტელეფონსაც წარვადგენთ. პირდაპირ შემიძლია გითხრათ, რომ გარე პირების შემხებლობა ვლინდება. „შავი ზარები“ არის მრავლად. გამოძიებამ უნდა გამოიძიოს, ეს მათ ბიზნესსაქმიანობას ეხება თუ სხვა რამეს. არსებობს ვარაუდი, რომ მათ მიმართ გარკვეული ჯგუფის ინტერესი არის.
აბსოლუტურად, თავიდან ბოლომდე, რა კითხვებიც იქნება, იმ კითხვებზე ექნება ბურჭულაძეს პასუხები. ეს არ იქნება მითითება და ვინმეს რამეში დადანაშაულება, მაგრამ სრულად უნდა მოხდეს გამოკვლევა ვის, რამდენად შეიძლება ბურჭულაძეების მიმართ ინტერესი ჰქონდეს. შეიძლება ბევრი ადამიანიც დასახელდეს“, - აცხადებს რამიშვილი.
ადვოკატის განმარტებით, ბურჭულაძის მობილური ტელეფონიდან გამავალი ზარები მისგან დამოუკიდებლად განხორციელდა. როგორც რამიშვილი აღნიშნავს, ერთ-ერთი ზარი ბანკში იყო განხორციელებული.
პაატა ბურჭულაძის შვილების, ალექსანდრე და შუქრი ბურჭულაძეების განცხადებით, ალექსანდრე ბურჭულაძის ტელეფონზე კიბერთავდასხმა განხორციელდა და ტელეფონი დამოუკიდებლად სხვადასხვა ფუნქციებს ასრულებდა. ბურჭულაძეებმა დღეს პროკურატურას მიმართეს.
