"შსს-ს მიერ აქციასთან - #არაჩადებას მიერთება არანაირად არ გულისხმობს ვინმეს მიერ აღიარებას, რომ ასეთ შემთხვევებს სისტემური ხასიათი შეიძლება ჰქონდეს", - ამის შესახებ პარლამენტის საპროცედურო საკითხთა კომიტეტის თავმჯდომარემ, გიორგი კახიანმა განაცხადა.
მისივე თქმით, ხელისუფლებაა ადამიანის უფლებებზე ორიენტირებული მიდგომები აქვს.
"ჩვენ ვართ თანამოაზრე მოძრაობის #არაჩადებას იმ თვალსაზრისით, რომ ეს უნდა იყოს დაუშვებელი. თეორიულად ყოველთვის, ნებისმიერ სახელმწიფოში შეიძლება ასეთ დანაშაულებრივ ქმედებებს ჰქონდეს ადგილი, მაგრამ სახელმწიფო იმისთვის არის, რომ ასეთის არსებობის შემთხვევაში რეაგირება მოახდინოს. ჩვენ გვქონდა სამწუხარო გამოცდილება, როდესაც ასეთ შემთხვევებს ჰქონდა სისტემური ხასიათი. სისტემური ხასიათი ვერ ექნება, თუ პოლიტიკური ელიტის მხრიდან არ აქვს მხარდაჭერა. ჩვენი ხელისუფლება არის განსხვავებული ხელისუფლება, რომელსაც ადამიანის უფლებებზე ორიენტირებული მიდგომები აქვს", - განაცხადა კახიანმა.
შეგახსენებთ, გუშინ საქართველოს შინაგან საქმეთა სამინისტრო აქციას - #არაჩადებას შეუერთდა.