"არ მივცემთ ივანიშვილის მთავრობას უფლებას, რომ ქვეყანა დატოვოს პოლიტიკურ ჭაობში", - ამის შესახებ "ევროპული საქართველოს" პოლიტსაბჭოს ახალმა თავმჯდომარემ, გიგა ბოკერიამ დღეს გამართულ ყრილობაზე განაცხადა.
"საქართველოს კიდევ ერთხელ დააკარგვინოს შანსი კეთილდღეობისკენ სწრაფვაში. საქართველო იქნება ევროპული, ღირსეული, მოქალაქეების მიერ შექმნილი ქვეყანა და ჩვენ, ყველა ამას გავაკეთებთ ერთად. ხონის და ვანის გავლით ევროპული საქართველოსკენ! "ევროპული საქართველო" არის ნამდვილი საქართველო! ''– განაცხადა ბოკერიამ.
შეგახსენებთ, დღეს "ევროპულმა საქართველომ" პოლიტსაბჭოს თავმჯდომარედ გიგა ბოკერია აირჩია
ასევე, დღევანდელ ყრილობაზე გახდა ცნობილი, რომ ხონისა და ვანის გაერთიანებულ ოლქში ,,ევროპული საქართველოს” მაჟორიტარი დეპუტატობის კანდიდატი თბილისის ყოფილი მერი და პარტიის გენერალური მდივანი - გიგი უგულავა იქნება.
ხონისა და ვანის გაერთიანებულ ოლქში შუალედური არჩევნების ჩატარება მას შემდეგ გახდა საჭირო, რაც "ქართული ოცნების" დეპუტატმა გრიგოლ ლილუაშვილმა სახელმწიფო უსაფრთხოების სამსახურში გადაინაცვლა. ლილუაშვილი, რომელიც ხონისა და ვანის მაჟორიტარი 2016 წლის საპარლამენტო არჩევნების შედეგად გახდა, ამჟამად ვახტანგ გომელაურის მოადგილეა.
შუალედური არჩევნები 2018 წლის აპრილში გაიმართება.
