„პრეზიდენტ მარგველაშვილთან არსებული შეწყალების კომისის მიერ ბაჩოს შეწყალების მოთხოვნა, ცირკის ნაწილია. მათ ძალიან კარგად იციან ბაჩო რის გამოც ზის. ეს არ არის ჩვეულებრივი შემთხვევა და ვიღაც კრიმინალის მიერ ჩადენილ დანაშაულთან არ გვაქვს საქმე, რომ შესწავლა დაიწყონ“, - განუცხადა „ჯი-ეიჩ-ენს“, ბაჩო ახალაიას მეუღლემ და ადვოკატმა, ანი ნადარეიშვილმა.
ახალაიას და ნადარეიშვილის განცხადებით, კომისიის და პრეზიდენტის მხრიდან ბაჩოს თავისუფლების თაობაზე ნებისმიერი სახის მსჯელობა შეურაცხმყოფელია.
„ეს ნამდვილად შეურაცხმყოფელია, რადგან იმ სამხედროების ოჯახებმა, რომლებიც ბაჩოს გამო დაატყვევეს, პრეზიდენტს შეწყალების მოთხოვნით მიმართეს და ცივი უარით გაისტუმრეს, მათი საქმე არც კი განიხილეს. ამას გარდა, პრეზიდენტი სამწუხაროდ, რუსული თამაშის ნაწილია. მოგეხსენებათ, ჩვენს ქვეყანას რუსული ძალა მართავს და ეს რუსული ჰიბრიდული ომია. სწორედ ამ ომის ტყვეები არიან ეს ადამიანები, რომლებიც პოლიტიკური ნიშნით არიან დაპატიმრებულები“, - აცხადებს ნადარეიშვილი.
ამასთანავე, ის განმარტავს, რომ სასამართლო პროცესები ხელოვნურად ჭიანურდება.
„ბაჩო ჩვეულებრივი პატიმარი არ არის, რადგან მას ათვლილიც კი არ აქვს სასჯელის ის ვადა, რომელიც მას ივანიშვილის მარიონეტულმა სასამართლომ მიუსაჯა. ბაჩომ არც დასაწყისი იცის როდიდან ითვლება მისი სასჯელი და არც ბოლო, როდის გამოდის, ის ჩვეულებრივი ტყვეა.
სააპელაციო სასამართლოში, კანონით გათვალისწინებული 4 თვის ნაცვლად, 4 წელია, საპელაციო სარჩელის განხილვა მიმდინარეობს. საერთოდ არ ტარდება პროცესები, უაზრო მიზეზებით ჭიანურდება, თითქოს, პანაშვიდებზე დადიან მოსამართლეები და არ სცალიათ. აქედან გამომდინარე, ამ რუსულ ხელისუფლებას კიდევ ერთი ინსტრუმენტი აქვს, ისინი როგორ სასჯელსაც მოისურვებენ, ისეთს მიუსჯიან“, - აცხადებს ნადარეიშვილი.
შეგახსენებთ, რომ გენერალმა გოგი თათუხაშვილმა ბაჩო ახალაიას შეწყალების მოთხოვნით, პრეზიდენტის ადმინისტრაციას მიმართა.
ამის შესახებ ინფორმაციას თავად პრეზიდენტის ადმინისტრაციამ გაავრცელა, სადაც წერია, რომ თათუხაშვილმა საქართველოს პრეზიდენტს ომის ვეტერანთა და ძალოვანი სტრუქტურების ყოფილი თანამშრომლების შეწყალების თხოვნით მიმართა, მათ შორის არის ბაჩანა ახალაიაც.
ადმინისტრაციის განცხადებით, კანონმდებლობის შესაბამისად, პრეზიდენტის ადმინისტრაციამ ავტომატურად მიმართა სასჯელაღსრულებისა და პრობაციის სამინისტროს და 17 ადამიანის შესახებ სათანადო დოკუმენტაცია გამოითხოვა.
თავის მხრივ, პრეზიდენტთან არსებულ შეწყალების კომისიას საქართველოს ყოფილი თავდაცვის მინისტრი, ბაჩო ახალია მიმართავს და ის მოუწოდებს კომისიას, არ განიხილონ მისი შეწყალების საკითხი.
