"ფაქტია, რომ ამ თემისადმი, საზოგადოების დიდი ინტერესია. იმედი მაქვს, პრეზიდენტიც გამოხატავს ამ საკითხისადმი ინტერესს, სათანადოდ შეისწავლის და მუსტაფა ემრე ჩაბუქს საქართველოს მოქალაქეობას მიანიჭებს, რომელიც თავისთავად ექსტრადიციას გამორიცხავს“, - განუცხადა „ჯი-ეიჩ-ენს“ ჩაბუქის ადვოკატმა, ვახო კვიჟნაძემ.
როგორც ადვოკატი განმარტავს, დაცვის მხარემ ლტლოვილის, ან ჰუმანიტარული სტატუსის მინიჭებასთან დაკავშირებით ქართულ სასამართლოებში ბრძოლა დაასრულა. სააპელაციო სასამართლო იყო ბოლო ინსტანცია, რომელმაც დღეს ეს საკითხი განიხილა და უცვლელად დატოვა საქალაქო საასმართლოს გადაწყვეტილება.
„პროკურატურას ახლა გზა აქვს გახსნილი, მათ სურვილის შემთხვევაში შეუძლიათ სასამართლოს მიმართონ და ექსტრადირების პროცედურების დაწყებასთან დაკავშირებით ნებართვა მიიღონ. რა თქმა უნდა, ამას შევწინააღმდეგებით, მაგრამ თუკი, ეს ბრძოლა პირველ ინსტანციაში პროკურატურის სასარგებლოდ დასრულდება, შეგვიძლია უზენაეს სასამართლოს მივმართოთ.
თუკი, უზენაესი სასამართლოც პროკურატურის სასარგებლოდ მიიღებს გადაწყვეტილებას, იუსტიციის მინისტრს ექნება შესაძლებლობა და არა ვალდებულება, ჩაბუქის თურქეთის რესპუბლიკაში ექსტრადირების ბრძანება გასცეს. ჩვენ რა თქმა უნდა, ადამიანის უფლებათა ვროპულ სასამართლოს ექსტრადიციის პროცესის შეჩერებასთან დაკავშირებით მივმართავთ“, - აცხადებს კვიჟინაძე.
შეგახსენებთ, რომ 2017 წლის მაისში, თბილისში, თურქეთის მხარის მოთხოვნით, დემირელის კერძო კოლეჯის ხარისხის მართვის მენეჯერი მუსტაფა ემრე ჩაბუქი დააკავეს. მოგვიანებით, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს ბრალდებულის ოჯახმა და ადვოკატმა ჩაბუქისთვის ლტოლვილის სტატუსის მინიჭებაზე მიმართეს, თუმცა, სამინისტროსგან უარი მიიღეს.
