მე ვიცი სოსო ოსორაულის სავარაუდო ადგილსამყოფელი, თუმცა ამას ვერ გავასაჯაროებ, - ამის შესახებ კონგოში დატყვევებული მფრინავის, სოსო ოსორაულის ძმამ, გიორგი ოსორაულმა განაცხადა, რომელიც ჟურნალისტებს ”ადამიანის უფლებათა ცენტრში” ,,სკაიპით“ ჩაერთო.
,,იმას, რომ სოსო ოსორაული გარდაცვლილია, მხოლოდ საგარეო საქმეთა სამინისტრო მეუბნება, აღნიშნულს სხვა არავინ მიდასტურებს. მე ბევრ თემაზე არ შემიძლია ხმამაღლა საუბარი, თუმცა ის ვიცი, რომ სოსო ოსორაული ცოცხალია. მიზანი მაქვს, რომ ჩავიდე აფრიკაში და შევხვდე იმ პირებს, ვინც ინფორმაციას მაწვდის. მე ვიცი სავარაუდო ადგილსამყოფელი, თუმცა ამას ვერ გავასაჯაროებ”, - განაცხადა გიორგი ოსორაულმა. იგი უარყოფს გავრცელებულ ინფორმაციას, რომ ის უშუალოდ ესაუბრა დაკარგულ ძმას.
გიორგი ოსორაული საქართველოს პროკურატურის მიერ დაწყებულ გამოძიებას უნდობლობას უცხადებს და აღნიშნავს, რომ მისთვის გაუგებარია, ამ დრომდე რატომ არ მოხდა მისი ოჯახისთვის დაზარალებულის სტატუსის მინიჭება.
”სტატუსს სავარაუდოდ, იმიტომ არ მაძლევენ, რომ თვითონაც არ არიან სოსო ოსორაულის დაღუპვის ამბავში დარწმუნებული. საგარეო უწყებასთნ ბოლოს 14 აგვისტოს მქონდა კონტაქტი. მას შემდეგ სამინისტროდან არავინ დამკავშირებია. რაც შეეხება პროკურატურას, ჩემთვის უცნობია, თუ რისი გაგება უნდათ ჩემგან”, - განაცხადა ოსორაულმა.
რაც შეეხება ”ადამიანის უფლებათა ცენტრს” აქ აცხადებენ, რომ მათ არაერთხელ მიმართეს მთავარ პროკურატურას განცხადებით, რათა ოჯახს მისცემოდა საქმის მასალების გაცნობის საშუალება, მაგრამ ორგანიზაციას დღემდე პროკურატურიდან პასუხი არ მიუღია.
