„სოსო არ მინახავს, არ მისაუბრია, მაგრამ ამ ადამიანს ვეძებ, როგორც ცოცხალს და არა როგორც დაღუპულს, ზუსტად ვიცი, რომ ის ცოცხალია. ყველაფერზე ვერ ვისაუბრებ, მაგრამ რაღაც სიტუაციები, ნიუანსები მაძლევს იმის საფუძველს, რომ ასე ვიფიქრო“, - განუცხადა „ჯი-ეიჩ-ენს“ გაუჩინარებული მფრინავის, სოსო ოსორაულის ძმამ, გიორგი ოსორაულმა.
მან ძმის მოძებნა საკუთარი ძალებით გადაწყვიტა და საქართველოდან დაახლოებით, 3 კვირის წინ გაემგზავრა. ოსორაული მის ადგილსამყოფელს არ აკონკრეტებს, თუმცა, „ჯი-ეიჩ-ენთან“ ადასტურებს, რომ ის რამდენიმე ხნის წინ, გერმანიაში იმყოფებოდა.
„საქართველო დავტოვე, ჩემი მიზანია, აფრიკაში ჩავიდე, სოსო აფრიკაშია, მაგრამ კონკრეტულად სად არის, ვერ გეტყვით“, - დასძენს ოსორაული.
მისი განმარტებით, მიუხედავად არაერთი დაპირებისა, სახელმწიფოს მხრიდან დაკარგული მფრინავის მოსაძებნად სათანადო მხარდაჭერა ვერ იგრძნო.
„საქმე იმაშია, რომ სახელმწიფოს მხრიდან არანაირი სახის დახმარება არ ყოფილა. შესაბამისად, ჩემი, ახლობლების და იმ ადამიანების დახმარებით ვიმყოფები აქ, რომელთაც უნდათ, დაგვეხმარონ“, - აცხადებს გიორგი ოსორაული.
შეგახსენებთ, რომ 42 წლის ქართველი მფრინავი სოსო ოსორაული ერთი წლის წინ, კონგოში, უკანონო შეიარაღებულმა დაჯგუფებამ გაიტაცა.
ქართველი პილოტები კონგოს დემოკრატიულ რესპუბლიკაში სამუშაოდ მას შემდეგ წავიდნენ, რაც საქართველოს თავდაცვის სამინისტრომ ისინი სამსახურიდან გაათავისუფლა.
სოსო ოსორაული აგვისტოს ომის გმირია. 2008 წლის რუსეთ–საქართველოს ომის დროს, 11 აგვისტოს, მან ბოლო გაფრენა შეასრულა ცხინვალის მიმართულებით და მე-2 ქვეითი ბრიგადის ორი ბატალიონი ალყიდან დაიხსნა.