„სიმართლე გითხრათ, მე არ მქონია განცდა, რომ ვესროლე სასამართლოს ფანჯარას. მე მქონდა განცდა, რომ ვესროლე უსამართლობის კერას", - განაცხადა ჟურნალისტებთან ბექა წიქარიშვილმა.
თბილისის საქალაქო სასამართლოში წიქარიშვილის პროცესი რამდენიმე საათით გადაიდო, რადგან მისმა ადვოკატმა საქმის მასალების გასაცნობად დრო ითხოვა. პროცესის დაწყებამდე კი, მოსამართლემ ბექა წიქარიშვილი პატიმრობიდან გაათავისუფლა.
„ადმინისტრაციული სამართალდარღვევის ფაქტს მე ვაღიარებ. უბრალოდ, მე არასამართლიანი მგონია სისხლის სამართლის საქმე, რომელიც იგივე ქმედებაზე მიმდინარეობს. იმედი მაქვს, სისხლის სამართლის საქმე შეწყდება. ჩემი გუშინდელი ქმედება იყო გამოწვეული კონკრეტული პროტესტით, აღელვებით და იმ გადაწყვეტილებით, რომელიც გიორგი გიორგანაშვილის მიმართ გამოიტანა სასამართლომ.
ბახალას“ განაჩენი, ჩემი აზრით, სასამართლოს კიდევ ერთი სირცხვილია. შორენა გუნცაძეს შეუძლია ჩაეწეროს ბადრი შონიას რიგებში. ფაქტობრივად, გამოიკვეთა ბოლო დროს ორი ძალიან სამარცხვინო სახე სასამართლოსი. მე არ მქონია განცდა, რომ ვესროლე სასამართლოს შუშას, მქონდა განცდა, რომ ვესროლე იმ უსამართლობის კერას, სადაც ადამიანები იკვებებიან სხვა ადამიანების გამწარებით“, - განაცხადა წიქარიშვილმა.
შეგახსენებთ, რომ მოძრაობა „თეთრი ხმაურის“ წევრი, ბექა წიქარიშვილი გუშინ, თბილისის საქალაქო სასამართლოს ეზოში დააკავეს. ის გიორგი გიორგანაშვილის, იგივე ბახალას, განაჩენის გამოცხადების შემდეგ, სასამართლოს ეზოში მომხდარი ინციდენტის დროს დააკავეს.
ცნობისთვის, ადმინისტრაციულ სამართალდარღვევათა კოდექსის 166-ე მუხლი, ჯარიმის სახით, 100 ლარის გადახდას, ან 15 დღიან პატიმრობას ითვალისწინებს.
