რუსეთისა და აშშ-ის სამხედრო ძალასთან დაკავშირებით კითხვას პასუხს სცემენ იქიდან გამომდინარე, თუ რომელ სამხედრო ძალასთან ჰქონდათ უშუალო შეხება, - ამის შესახებ NDI-ის საქართველოს ოფისის დირექტორმა ლორა თორნტონმა განაცხადა. მისი თქმით, კითხვა კვლევების განმავლობაში პირველად დაისვა.
„ჩვენ ძალიან საინტერესო ახალი კითხვა გვქონდა, რომელიც უფრო ძლიერია სამხედრო თვალსაზრისით - რუსეთი თუ აშშ და მოსახლეობის უმეტესობა ამბობს, რომ რუსეთი, თუმცა ჩვენი თეორია არის ის, რომ ადამიანები ამ კითხვას პასუხს სცემენ იქიდან გამომდინარე, თუ რომელ სამხედრო ძალასთან ჰქონდათ უფრო მეტი უშუალო შეხება და ცხადია, ეს არის რუსეთი. თბილისი იყოს გამონაკლისი და ამ შემთხვევაში მოსახლეობის უმეტესი ნაწილი ამბობდა, რომ აშშ უფრო ძლიერია სამხედრო კუთხით“, - განაცხადა ლორა თორტონმა.
ეროვნულ-დემოკრატიული ინსტიტუტის (NDI) კვლევის თანახმად, გამოკითხულთა უმრავლესობა მიიჩნევს, რომ სამხედრო ძალის თვალსაზრისით რუსეთი უფრო ძლიერია, ვიდრე აშშ.
კითხვაზე, თქვენი აზრით, რომელი ქვეყანაა უფრო ძლიერი სამხედრო თვალსაზრისით - რუსეთი თუ აშშ, პასუხები ასე გადანაწილდა, გამოკითხულთა 41% მიიჩნევს, რომ რუსეთი, 36% აცხადებს, რომ აშშ, 15%-ის აზრით, თანაბარი სიძლიერის არიან, ხოლო 8% აცხადებს, რომ არ იცის.
NDI-ის კვლევის საველე სამუშაოები ჩატარდა 29 ნოემბერი-19 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით), 2,298 პირისპირ ინტერვიუს წარმომადგენლობითი შერჩევის საფუძველზე, ცდომილების ზღვარია +/-1.9%.
კვლევები ხორციელდება დიდი ბრიტანეთის მთავრობის UK aid-ის ფინანსური ხელშეწყობით. გამოკითხვას ატარებს CRRC-საქართველო.
შედეგების მეორე ნაწილის პრეზენტაცია ხუთშაბათს, 18 იანვარს გაიმართება.
