რამდენიმე წუთში თბილისის საქალაქო სასამართლოში ბუტა რობაქიძის მკვლელობის საქმეზე მთავარ მოწმეს, ყოფილ მსჯავრდებულს, გიორგი ბაშალეიშვილს დაცვის მხარე დაკითხავს. როგორც ადვოკატები აცხადებენ, მასთან მნიშვნელოვანი კითხვები ექნებათ.
საქმის პროკურორის, გიორგი ოსაძის თქმით, მოწმეების მიერ დასახელებული ჭაღარა პირი, რომელიც მათ მითითებებს აძლევდა, რომ ყალბი ჩვენებები მიეცათ, იდენტიფიცირებული არ არის.
"საქმის არსებითი განხილვისას რამდენიმე მოწმემ ნამდვილად დაასახელა და მიუთითა კონკრეტულ პიროვნებაზე, რომლის აღწერილობაც ერთმანეთს ემთხვევა, თუმცა, დღეის მდგომარეობით, აღნიშნული პიროვნება იდენტიფიცირებული არ არის", -განაცხადა პროკურორმა გიორგი ოსაძემ.
საქმეზე ერთ-ერთი ბრალდებულის, გურამ დონაძის განცხადებით, ბრალდების მხარის მიერ წარმოდგენილი თითქმის 80 ადამიანი ამბობს, რომ თითოეული მათგანი გააფრთხილა ვინმე ჭაღარა ულვაშებიანმა კაცმა და უთხრა, "ჩვენ მოვკალით ადამიანი, იარაღები უნდა მოვიტანოთო და ასე და ასე უნდა დაწეროთო"..
შეგახსენებთ, ბუტა რობაქიძის მკვლელობის საქმეზე სამსახურებრივი უფლებამოსილების ბოროტად გამოყენებას შსს ყოფილ მაღალჩინოსნებს ედავებიან. აღნიშნულზე ბრალდებულია 5 პირი : გურამ დონაძე, ირაკლი ფირცხალავა, ზაზა ბაქრაძე, დავით იაშვილი და ზურა მიქაძე.
