მერიის ყოფილი თანამშრომლის, ოთარ აბესაძის საქმის პროკურორის, ირაკლი მარშანიას განცხადებით, ექსპერტიზის დასკვნაში საუბარი იყო ისეთ დიაგნოზზე, რომლის მკურნალობაც სავსებით შესაძლებელი იყო პენიტენციური დაწესებულების პირობებში.
პროკურორის მტკიცებით, აღკვეთის ღონისძიების სახის - პატიმრობის გირაოთი შეცვლის სამართლებრივი საფუძველი არ ყოფილა.
„სასამართლოს ძალაში უნდა დაეტოვებინა შეფარდებული აღკვეთის ღონისძიების სახე - პატიმრობა, საქმის განხილვის ეტაპზე, მოსამართლის გადაწყვეტილების გასაჩივრების ბერკეტი არ არსებობს, თუმცა აქვე განვმარტავ, რადგან დღეს აბესაძე გაათავისუფლეს პატიმრობიდან არ ნიშნავს, რომ ის არ არის დამნაშავე. არსებითი განხილვა გრძელდება და ვფიქრობ, მოცემულ საქმეზე გამამტყუნებელი განაჩენი დადგება“. - განაცხადა პროკურორმა.
შეგახსენებთ, ოთარ აბესაძე დღეს, 15 იანვარს სასამართლო დარბაზიდან, 10 000 ლარიანი გირაოს სანაცვლოდ გაათავისუფლეს.
შეგახსენებთ, მერიის ყოფილი თანამშრომელი ოთარ აბესაძე ქრთამის აღების ბრალდებით სუს-მა დააკავა. გამოძიების თანახმად, აბესაძემ მდინარე მტკვარზე, გარკვეული კონსტრუქციის აშენებისთვის საჭირო ნებართვის მისაღებად და ნებართვის მიღებამდე მშენებლობის წარმოების მფარველობის სანაცვლოდ მოქალაქეს 3 ათასი დოლარი ქრთამის სახით გამოართვა.