"სამართალმა იზეიმა, თუმცა ეს არის აღკვეთის ღონისძიების შეცვლა და არა გამამართლებელი განაჩენი", - ამის შესახებ მერიის ყოფილი თანამშრომლის, ოთარ აბესაძის ერთ-ერთმა ადვოკატმა, ლილი გელაშვილმა ბრალდებულის გირაოთი გათავისუფლების შემდეგ განაცხადა.
ადვოკატმა მტკიცებით, ის მძიმე ავადმყოფია.
"დაცვის მხარემ სასამართლოსთან იშუამდგომლა აღკვეთის ღონისძიების შეცვლასთან დაკავშირებით. ახალი ექსპერტიზის დასკვნა გვქონდა ოთარ აბესაძის ჯანმრთელობის მდგომარეობასთან დაკავშირებით, რომელშიც ცალსახად არის დაწერილი, რომ ის მძიმე ავადმყოფია და მისი მდგომარეობა პენიტენციალურ სისტემაში ყოფნისას გაუარესდებოდა. მინდა სასამართლოს მიმართ მადლიერება გამოვხატო, ამდენი წვალების მიუხედავად, სამართალმა იზეიმა, თუმცა ეს არის აღკვეთის ღონისძიების შეცვლა და არა გამამართლებელი განაჩენი"- განაცხადა ლილი გელაშვილმა.
უფლებადამცველმა ოთარ აბესაძის კონკრეტულ დაავადებებთან დაკავშირებით საუბარი არ ისურვა, რადგან ეს პერსონალურ მონაცემებს შეიცავს.
შეგახსენებთ, ქრთამის აღების ბრალდებით დაკავებული ოთარ აბეასაძე თბილისის საქალაქო სასამართლოში, 10 000 ლარიანი გირაოს სანაცვლოდ გაათავისუფლეს.