„ერთიანი ნაციონალური მოძრაობის“ წევრის, ხატია დეკანოიძის შეფასებით, დღეს ორი ქვეყნის ადმინისტრაციული რესურსი მიმართულია მიხეილ სააკაშვილის წინააღმდეგ.
მისივე აზრით, დღეს მიღებული გადაწყვეტილება ეჭვქვეშ აყენებს საქართველოს დემოკრატიის განვითარებას და მომავალს.
„მიხეილ სააკაშვილი გაასამართლეს მისთვის კონსტიტუციით მინიჭებული უფლებისთვის, რაც არის აბსურდული ბრალდება. თუმცა, ეს არის პოლიტიკური მართლმსაჯულება და სწორედ პოლიტიკური მართლმსაჯულება აზიანებს სახელმწიფოს. ძალიან სამწუხაროა, რომ ხელისუფლებას ეს არ ესმის და ცუდია, რომ მთელი სასამართლო სისტემა ერთი ადამიანის ხელშია. მიხეილ სააკაშვილის პროცესი ფორსირებულად მიდის მას შემდეგ, რაც უკრაინის ადმინისტრაციული რესურსი დაუპირისპირდა მიხეილ სააკაშვილს. არავის ეჭვი არ ეპარება, რომ რეალურად ბრალდება მოტივირებული იყო, რომ დაკვეთა შეესრულებინა. მიხეილ სააკაშვილის ექსტრადირებას არ გამოვრიცხავ, რადგან ორი ქვეყნის ადმინისტრაციული რესურსი მიმართულია ერთი ადამიანის წინააღმდეგ“, - განაცხადა ხატია დეკანოიძემ.
თბილისის საქალაქო სასამართლომ მიხეილ სააკაშვილს გირგვლიანის საქმეზე 3 წლით თავისუფლების აღკვეთა მიუსაჯა და ამასთანავე ჩამოართვა თანამდებობის დაკავების უფლება 1 წლითა და 5 თვის ვადით.
