ამ წუთებში, თბილისის საქალაქო სასამართლოში, ბუტა რობაქიძის მკვლელობის საქმეზე, სამსახურეობრივი უფლებამოსილების ბოროტად გამოყენებაში ბრალდებული შსს ყოფილი მაღალჩინოსნების პროცესი მიმდინარეობს. დღეს ბრალდების მოწმეები - გადაცემა "პატრულის" ყოფილი თანამშრომელი და იმჟამინდელი კრიმინალური პოლიციის თანამშრომლები დაიკითხებიან.
საქმის პროკურორის, გიორგი ოსაძის განცხადებით, დღევანდელ სასამართლო სხდომაზე მოწმეები დაადასტურებენ გამოძიებისთვის მიცემულ ჩვენებებს.
"ეს მოწმეები ბრალდების მხარის არგუმენტებს გაამყარებენ. კერძოდ, გადაცემა "პატრულის" თანამშრომელი ისაუბრებს, რომელიც შემთხვევის ადგილზე 15-20 წუთის შემდეგაა მისული. ასევე, ჩვენებას მისცემენ პოლიციის ყოფილი თანამშრომლები, რომლებიც შემთხვევის ადგილზე დაახლოებით ნახევარ საათში მივიდნენ. რაც შეეხება იარაღის წარმომავლობას, გამოძიებისთვის მიცემული ჩვენების მიხედვით, მათთვის მათი წარმომავლობა უცნობია", - აცხადებს პროკურორი.
