პაკისტანში, სულ ცოტა, ცხრა ადამიანი ახალშეუღლებული წყვილის მკვლელობასთან კავშირში ბრალდებით დააკავეს. ქალაქ კარაჩიში პოლიციის ინფორმაციით, ახალგაზრდა წყვილი, რომელიც ოჯახის თანხმობის გარეშე იყო დაქორწინებული, გასულ კვირაში მოკლეს ნათესავებმა ადგილობრივ უხუცესთა საბჭოს დავალებით. ასეთ საბჭოს „ჯირგას“ უწოდებენ.
24 წლის აბდულ ჰადი და 20 წლის ჰასინა ბიბი ჩრდილოეთში მდებარე ხიბერ-პახტუნხვის პროვინციიდან იყვნენ და ამ თვენახევრის წინ კარაჩიში დაქორწინდნენ. როგორც პოლიცია აცხადებს, აბდულ ჰადის მამა და რამდენიმე ნათესავი დაპატიმრებულ იქნენ მას შემდეგ, რაც 26 ნოემბერს კარაჩის ერთ-ერთ სასაფლაოზე იპოვეს მოკლული ახალგაზრდების გვამები. დაკავებულების თქმით, მათ ჯირგის გადაწყვეტილებით მოკლეს ახალგაზრდა ცოლ-ქმარი „პაშტუნთა კულტურის შერცხვენისთვის“.
პაკისტანში ყოველ წელს ასობით ადამიანი ეწირება „ღირსების დასაცავ მკვლელობებს“.
