ევროპის საბჭოს საპარლამენტო ასამბლეის მონიტორინგის კომიტეტის მომხსენებლებმა მაიკლ იენსენმა და კასტრიოტ ისლამმა თბილისიდან გამგზავრებამდე, განაცხადეს, რომ, საქართველოს გარკვეული წარმატებები აქვს ქვეყანაში დემოკრატიული პროცესების განვითარების კუთხით და სასჯელაღსრულების სისტემაში განხორციელებული რეფორმების მიმართულებით, თუმცა მათი თქმით, ეს საკმარის არ არის და საქართველოს კვლავ მოუწევს მუშაობა იმისათვის, რომ დასავლეთის დემოკრატიის ხარისხს გაუთანაბრდეს.
"ჩვენ შევხვდით პრეზიდენტს, ოპოზიციას, უმრავლესობას, ადგილობრივი ხელისუფლების წარმომადგენლებს. ვნახეთ ცხოვრების ყველა ასპექტი. ნამდვილად შთამებჭდავია, ის შედეგები, რასაც საქართველომ მიაღწია დემოკრატიული განვითარების მიმართულებით, სასჯელაღსრულების რეფორმა და სხვა მრავალი, მაგრამ არსებობს გარკვეული ხარვეზები, რომლებიც უნდა გამოსწორდეს. ამ ყველაფერს დავწერთ ევროსაბჭოსთვის წარსადგენ ანგარიშში. იმედი გვაქვს თქვენი ქვეყანა მალე გაუთანაბრდება დასავლური სტილის დემოკრატიას. ჩვენ სწორედ ასეთი საქართველო გვინდა", - განაცხადა მაიკლ იანსენმა.
ცნობისათვის, ევროპის საბჭოს საპარლამენტო ასამბლეის მონიტორინგის კომიტეტის მომხსენებლები მაიკლ იენსენი და კასტრიოტ ისლამი, სამდღიანი ვიზიტის ფარგლებში, საქართველოში შეხვდნენ ხელისუფლების წევრებს, დეპუტატებს, არასამთავრობო ორგანიზაციებისა და საერთაშორისო მისიების წარმომადგენლებს. განიხილეს ქვეყანაში მიმდინარე რეფორმები, ადამიანის უფლებების დაცვის კუთხით არსებული მდგომარეობა, სასამართლო სისტემა და 30 მაისის ადგილობრივი თვითმართველობის არჩევნები. ყოველივე ამაზე, მაიკლ იანსენი და კასტრიოტ ისლამი ანგარიშს მოამზადებენ, რომელსაც ევროპის საბჭოს საპარლამენტო ასამბლეის მონიტორინგის კომიტეტს წარუდგენენ.
