საპარლამენტო უმრავლესობის წარმომადგენელი, ვიცე-სპიკერი გიგი წერეთელი უფასო სასადილოების დღგ-ისგან გათავისუფლებას ითხოვს. წერეთელმა ეს საკითხი ახალი საგადასახადო კოდექსის პირველი მოსმენით განხილვისას დააყენა. მაშინ მთავრობისგან პირობაც მიიღო, რომ საკითხის გათვალისწინება მოხდებოდა, თუმცა როგორც აღმოჩნდა, შესწორებულ კანოპროექტში საკითხი გათვალისწინებული არ არის.
დღეს საფინანსო საბიუჯეტო კომიტეტის სხდომაზე კი აღნიშნული საკითხი უკვე პარლამენტში ახლად შესულმა დეპუტატმა, ჩუღურეთის მაჟორიტარმა ანდრო ალავიძემ დააყენა.
როგორც ფინანსთა მინისტრის მოადგილემ ირაკლი სირაძემ აღნიშნა, ამ შეღავათის დაწესებით გაძნელდება ადმინისტრირება, თუ რომელი სასადილოა უფასო, ვინაიდან გარკვეული სასადილოები მუშაობენ ჩვეულებრივად და დროის გარკვეულ მონაკვეთებში აქვთ უფასო აქციები სხვადასხვა ორგანიზაციის დაკვეთით. სირაძეს მიაჩნია, რომ აღნიშნული ნორმის კანონში ჩაწერა გაუმართლებელი იქნება და აცხადებს, რომ თუკი უფასო სადილის აქციას დააფინანსებს რომელიმე თვითმმართველობა, ჯობს დღგ-ისთვის გადასახდელი თანხა გაიღოს თვითმმართველობამ. თუმცა როგორც წერეთელმა მის საპასუხოდ განაცხადა, ეს პრობლემა ადვილად მოგვარდება, თუკი კანონში ჩაიწერება, რომ დღგ-ისგან თავისუფლდებიან სპეციალური სასადილოები.
