მე კაპიტანი ვარ და რა თქმა უნდა, პასუხისმგებელი ვარ, გუნდი გავიყვანო, - ამის შესახებ საქართველოს ნაკრების ვიცე-კაპიტანმა გურამ კაშია LGBT პირთა მხარდამჭერი სამკლაურით თამაშზე საუბრისას, "რუსთავი 2"-სთვის მიცემულ ინტერვიუში განაცხადა.
როგორც კაშიამ აღნიშნა, აზრადაც არ მოსვლია, სამკლაური მისი ინიციატივით გაეკეთებინა.
„თვითონ ჰოლანდიელი ხალხიც არავინ არ ელოდა ამხელა გამოხმაურებას საქართველოში. მე კაპიტანი ვარ და რა თქმა უნდა, პასუხისმგებელი ვარ, გუნდი გავიყვანო. ეს ჩვეულებრივი თამაში იყო, რომელიც უნდა მეთამაშა.
ჩემ გარდა, ერედივიზიონის ყველა კაპიტანს, ქვედა ლიგებსა და ქალთა ლიგაში, ყველას ეკეთა, ვერც ხვდებიან, ამხელა ამბავი რატომ მოჰყვა, ვერც ვუხსნი. აზრადაც არ მომსვლია ეს სამკლაური ჩემი ინიციატივით გამეკეთებინა. ბევრი ლაპარაკი გამოიწვია, რაც არ მსიამოვნებს, მართალი გითხრათ.
ჩემი საქმეა, ვიყო სპორტში, ფეხბურთში და ვაკეთებდე იმას, რაც მიყვარს. ეს ინციდენტი, სკანდალი, რა არ უწოდეს, იყო ჩვეულებრივი თამაში, რომელიც, „ვიტესის“ კაპიტანს უნდა ეთამაშა. კაპიტანი მე ვარ, ეს წლებია ასეა, ერთ თამაშში ხომ არ დამნიშნეს სპეციალურად“, - განაცხადა გურამ კაშიამ.